Dani Martín nació en Madrid el 19 de febreru de 1977. Crióse colos sos padres y la so hermana en Alcobendas,[4] pela rodiada de Madrid. Dende pequeñu gustába-y asonsañar a los sos artistes favoritos nel salón de la so casa, lo que lu llevó a suañar con formar el so propiu grupu dalgún día.
Consciente de que l'institutu nun-y atraía, empezó a trabayar col so padre al empar que desenvolvía los sos estudios d'Arte Dramático na escuela de Cristina Rota, quien-y facilitó los sos primeros trabayos como actor teatral y cómicu. Más tarde, decidiría camudar d'escuela, entrando na de William Layton. A partir del momentu en que terminó la so formación, Dani Martín empieza a apaecer en diversos papeles como actor, tantu en cine como en televisión. La so primer apaición en televisión foi como botones nun especial de Nuechevieya xunto a Martes y Trelce. Darréu, presentó'l programa musical Ponte les piles y tamién apaeció en dellos capítulos de series destacaes, como Al salir de clase, El comisario, Hospital central, 7 vidas, Raquel busca su sitio, Cuenta atrás o Los hombres de Paco, ente otres munches apaiciones. Mientres faía papeles diversos en cine y televisión, empezó a trabayar como repartidor de pidíos yá que, como él mesmu confesó, encantába-y conducir, según la llibertá qu'esi trabayu concedía-y al dexa-y tar na cai toa'l día escuchando y cantando la música que-y gustaba: los Pistones, Hombres G, los Nikis...[5]
A partir del añu 1994, Dani Martín lidera una banda llamada El canto del loco, colos que publica dellos discos destacaos y collecha munchos ésitos.En setiembre de 2009, El Canto del loco decide dixebrase, polo que Dani Martín empieza la so carrera musical en solitariu. N'agostu de 2010, Dani Martín publica'l primer senciellu del so primer álbum como solista. El senciellu llamóse "16 Añinos" y l'álbum "Pequeñu". En 2013, saca'l so segundu álbum: Dani Martín.
Carrera musical
Nel añu 1994 crea'l grupu musical El Canto del loco xunto a Iván Ganchegui, David Otero, el so primu, Jandro Velázquez y Chema Ruiz. Influyíos principalmente por otros grupos españoles de la década de 1980 y con cinco álbumes d'estudiu, El Canto del loco consiguió vender mientres los sos quince años de vida más d'un millón de copies de los sos discos,[6] convirtiéndose n'unu de los grupos musicales más importantes del panorama español de la dómina.[7][8][9] En setiembre de 2009, El Canto del loco decide dixebrase pa centrase nes carreres en solitariu de cada miembru del grupu.
El 25 d'agostu de 2010, Dani Martín publicó'l so primer senciellu en solitariu «16 añinos» y nel 26 d'ochobre de 2010 llanza al mercáu'l so primer discu en solitariu, Pequeñu. Dos de los cantares ("El mio llamentu" y "El cielu de los perros") tán dedicaes a la so hermana, finada en 2009 a los 34 años por un infartu cerebral. El 26 d'ochobre de 2010, gana nos premios 40 Principales el premiu al meyor artista solista y ye nomáu a meyor videoclip pol cantar "16 Añinos".
El 23 de payares de 2010 entamó la so primer xira en solitariu col so álbum Pequeñu en Madrid.
En 2012, grabó xunto a Miguel Bosé el cantar Te digo amor (orixinal del álbum Serenu de Bosé) para Papitwo, el nuevu álbum de duetos de Bosé, llanzáu'l 4 de setiembre.
Nesti mesmu añu, tamién grabó un dueto xunto a Tony Bennett, el cantar Are you having any fun? formó parte del discu del norteamericanu Viva Duets onde l'artista márcase duos colo más granao del cantar llatín.
En Mayu de 2013, anunciu al traviés de Twitter y de la so web oficial que'l so nuevu single diba llamase Cero y que saldría a la venta a partir del 3 de xunu en ITunes y en toles tiendes de discos dixitales españoles.
El 17 de setiembre de 2013 salió a la venta'l so segundu discu en solitariu, llamáu "Dani Martín". Nesti mesmu añu, el 25 d'ochobre empezó una xira de 12 conciertos n'España.
En 2014 fixo una xira de munchos más conciertos, nos que gran parte d'ellos escosó totalmente les entraes. Dos conciertos d'esta xira (22 y 23 de mayu nel Palaciu de los Deportes de Madrid) fueron grabaos y el 14 d'ochobre de 2014 salió a la venta l'álbum en direutu tituláu "el mio teatru", qu'inclúi tamién el DVD del conciertu con artistes convidaos como Alejandro Sanz, Joaquin Sabina, Serrat, Leiva y l'arxentín Axel.
En setiembre y ochobre de 2015 realizó una xira de dos únicos conciertos n'España titulada "La Cuerda Fluexa", enllenando Les Ventes y el Pabellón Olímpicu de Badalona para asina celebrar los sos 15 años nel mundu de la música. Leiva, Sidecars y Estopa fueron los artistes convidaos p'acompaña-y en dichos eventos.
En 2017, el día 4 de febreru, empieza la Xira El Monte Rusu . Consta de 25 conciertos, que les sos entraes escosar na mayoría de los casos. L'aventura arrinca en Xixón, sigue en Zaragoza y llévalu por Vigo, Santander, San Sebastián, Pamplona, Bilbao, Cáceres, Vitoria, Valladolid, Sevilla, Granada, Murcia, Roquetas de Mar, Alicante, Valencia, Palma de Mallorca, Les Palmes de Gran Canaria, Tenerife, Cádiz y Málaga, hasta finales de mayu. De siguío, en xunu, va empezar una xira per Colombia, Perú y Méxicu. Al so regresu, va actuar en Marbella n'agostu, en Córdoba y Mérida en setiembre, n'A Coruña, Logroño, Salamanca y Xerez n'ochobre, en Madrid (en cinco causes), Castellón y Albacete en payares y a lo último, en Barcelona, n'avientu, según los sos conciertos confirmaos a 7 de febreru de 2017.
Carrera interpretativa
Dende l'añu 2000, Dani Martín compaxina'l so llabor al mandu d'El Canto del loco, coles sos incursiones en cine y televisión.
Ente 2007 y 2008 protagonizó una serie pa la cadena de televisión Cuatro llamada Cuenta atrás, na qu'interpretaba al impulsivu inspeutor xefe de policía Pablo Corso. Contuvo dos temporaes .
Nos sos entamos como cantante conociéronse-y delles pareyes ente les sos munches fans, moces que suañaron con tener una vida de mancomún col mozu de los cantares nes que munches d'elles creyéronse ver reflexaes, pero nada seriu (según les declaraciones realizaes en delles entrevistes a diversos medios de comunicación) hasta que nel añu 2002 empezó a salir cola excantante de La Oreja de Van GoghAmaia Montero.
Tuvo una rellación cola presentadora Patricia Conde dende 2007 hasta 2009, que terminó con una amistosa separación ente dambos.
Dende 2009 y hasta 2012, caltuvo una rellación sentimental cola estilista Huga Rei, onde tuvieron a puntu de pasar pol altar.
Dende principios de 2014 y hasta setiembre d'esi mesmu añu, el cantante caltuvo una rellación sentimental cola actriz Blanca Suárez, a la que conoció mientres el rodaxe del videoclip del cantar Emocional, que terminó en setiembre de 2014.[10]
Dani Martín ye primu hermanu de David Otero, más conocíu como El Pescao.
