Frecuenta la universidá Mazarin de 1754 a 1761. Ellí estudia química, botánica, astronomía y matemátiques. La so primer publicación química apaeció en 1764. En 1767 trabaya nun estudiu xeolóxicu d'Alsacia y Lorena. Foi elixíu miembru de l'Academia de Ciencies en 1768. En 1771 cásase con Marie-Anne Pierrette Paulze, que traducirá darréu obres ingleses ya ilustrará los sos llibros. A partir de 1775 sirvió a l'administración real d'esplosivos, onde'l so trabayu traducíase en meyores na producción de pólvora y nel dominiu de l'agroquímica pola creación d'un nuevu métodu de producción de nitratos pola potasa d'Alsacia.
Unu de los esperimentos más importantes de Lavoisier foi la determinación de la naturaleza del fenómenu de la combustión. Esos esperimentos permitieron demostrar que la combustión ye un procesu qu'implica la combinación d'una sustancia col oxíxenu. Demostraría igualmente'l papel del oxíxenu na respiración vexetal y animal asina como'l so protagonismu na formación del furruñu. La esplicación de Lavoisier sobre la combustión remplará la teoría del floxistu, que postulaba que los materiales soltaben una sustancia llamada floxistu cuando amburaben.
Descubre tamién que l'aire inflamable de Henry Cavendish, que bautiza como hidróxenu (del griegu « formador d'agua »), reacciona col oxíxenu pa formar una rosada, tal y como Joseph Priestley l'observara, que yera l'agua. El trabayu de Lavoisier taba en parte sofitáu nesti de Priestley.
Nos sos trabayos titulaos Sur la combustion en général y Considérations générales sur la nature des acides (1778), demuestra que l'aire responsable de la combustión yera tamién una fonte d'acidez. En 1779 noma a esta parte del aire oxíxenu (del griegu « formador d'ácidu») y a la otra parte azote (nitróxenu, del griegu « ensin vida »). En Réflexions sur la phlogistique (1783), Lavoisier demuestra que la teoría del floxistu nun yera coherente.
Les esperiences de Lavoisier yeren los primeros esperimentos químicos verdaderamente cuantitativos enxamás executaos. Probó que, aunque la materia química cambia d'estáu nuna reacción química, la cantidá de materia ye la mesma nel entamu y nel final de la racción. Quema fósforu y azufre nel aire, y demuestra que los productos pesaben más que los reactivos de partida. Ensin embargu, el pesu ganáu yera'l perdíu pol aire. Estes esperiencies formen parte de los pegoyos de la llei de conservación de la material. Lavoisier estudia igualmente la composición de l'agua, y llama a los sos compuestos oxíxenu y hidróxenu.
Col químicu francés Claude-Louis Berthollet y otros, Lavoisier concibe una nomenclatura química o un sistema de nomes, que sirve de base al sistema modernu. Descríbelu nel Méthode de nomenclature chimique (1787). Esi sistema tovía ta funcionando, en gran parte, anguaño, y abarca nomes tales como l'ácidu sulfúricu, sulfatos, y sulfitos. El soTraité élémentaire de chimie (1789) ye consideráu como'l primer manual químicu modernu, y presenta una vista xunitaria de les nueves teoríes de la química, fizo un informe claru de la llei de conservación de la masa, y niega la existencia del floxistu. N'otra, Lavoisier clarifica'l conceptu d'un elementu como sustancia simple que nun podría ser descompuesta por nengún métodu conocía d'análisis químicu, y concibe una teoría de la formación de los compuestos químicos.
Igualmente la so obra contenía una llista d'elementos o sustancies que nun podíen ser descompuestes más, que incluyíen l'oxíxenu, el nitróxenu, l'hidroxenu, el fósforu, el mercuriu, el cinc, y l'azufre. La so llista, ensin embargu, incluyía tamién la lluz y el calor, que pensaba que yeren sustancies materiales.
D'una importancia capital na vida de Lavoisier foi l'estudiu de les lleis. Esto llévalu a interesase pola política francesa, y en consecuencia, obtién un trabayu como recaudador d'impuestos na Ferme Générale, una compañía privada de recaudación d'impuestos a la edá de 26 años. Intenta presentar reformes nel sistema monetariu francés y nel sistema impositivu. Nel so trabayu pal gobiernu, participa nel desarrollu del sistema métricu decimal p'afitar la uniformidá de los pesos y medíes en toa Francia.
Pola so pertenencia a la Ferme Générale, Lavoisier foi consideráu como traidor polos revolucionarios en 1794 y foi guillotináu en París el 8 de mayu de 1794, a la edá de 51 años, al mesmu tiempu que l'ensamu de los sos compañeros. Solicitó un aplazamientu pa terminar un esperimentu, respondiendo-y el presidente del tribunal revolucionariu: « La República nun tien necesidá de sabios nin de químicos, el cursu de la xusticia nun pue ser suspendíu. » Nun hai que perder de vista que los bienes de los condenaos yeren confiscaos en beneficiu del Estáu y que los fermiers généraux taben en posesión de les más grandes fortunes de Francia.
Les contribucioness fundamentales de Lavoisier a la química fueron el resultáu d'un esfuerciu consciente d'adaptar tolos esperimentos nel marcu d'una teoría simple. Establez la utilización coherente del equilibriu químicu, utiliza los sos descubrimientos sobre l'oxíxenu pa baltar la teoría del floxistu, y desarrolla un nuevu sistema de nomenclatura química que caltenía que l'oxíxenu yera un constituyente esencial de tolos ácidos (lo que más sero se revelaría incorrecto). Por primer vez, la noción moderna d'elementu taba presente sistemáticamente. Los tres o cuatro elementos de la química clásica empobinaron al sistema modernu, y Lavoisier escribió les reacciones con ecuaciones químiques que respetaben la llei de conservación de la masa.
Lavoisier retomó la máxima "Nada nun se pierde, nada nun se crea, too se tresforma." que tien el so aniciu n'Anaxagores de Clazomene.
↑Afirmao en: autoridaes BNF. Identificador BnF: 120790362. Data de consulta: 10 ochobre 2015. Autor: Biblioteca Nacional de Francia. Llingua de la obra o nome: francés.
.jpg)
