Amador Fernández

Amador Fernández
diputáu nes Cortes republicanes 25 febreru 1936 - 2 febreru 1939 Distritu: Uviéu Eleiciones: tercer llexislatura de la Segunda República Española diputáu nes Cortes republicanes 5 avientu 1933 - 7 xineru 1936 Distritu: Uviéu Eleiciones: segunda llexislatura de la Segunda República Española diputáu nes Cortes republicanes 10 xunetu 1931 - 9 ochobre 1933 Distritu: Uviéu Eleiciones: primer llexislatura de la Segunda República Española
Vida
Nacimientu	Samartín del Rei Aurelio[1], 1 d'avientu de 1894[1]
Nacionalidá	España
Muerte	La Paz ^(es) [1], 1 de payares de 1960[1] (65 años)
Estudios
Llingües falaes	castellanu
Oficiu	políticu, emplegáu, mineru
Llugares de trabayu	Madrid
Seudónimos	Amadorín
Serviciu militar
Lluchó en	Revolución de 1934
Creencies
Partíu políticu	Partíu Socialista Obreru Español

Amador Fernández Montes (1 d'avientu de 1894, Samartín del Rei Aurelio – 1 de payares de 1960, La Paz ^(es) ), conocíu popularmente como "Amadorín", foi un históricu socialista destacáu sindicalista del Sindicatu d'Obreros Mineros Asturianos del que foi presidente, diputáu nes cortes demientres tola republica española tuvo una participación relevante na Revolución de 1934 y foi miembru del Conseyu Soberanu d'Asturies y Lleón.

Biografía

Amador Fernández nació na aldea La Invernal, nel Conceyu de Samartín del Rei Aurelio el 1 d'avientu de 1894. Dende temprano entamó a trabayar como mineru. En 1909 ingresa nes Xuventudes Socialistes y llueu nel grupu organizador del Sindicatu Obreru de Mineros Asturianos (SOMA) onde se formó a la solombra del líder del sindicatu Manuel Llaneza. Foi alministrador de la Mina San Vicente que'l sindicatu esplotaba direutamente. Tres morrer Llaneza, asume la Presidencia del SOMA y con Belarmino Tomás y Ramón González Peña formaría'l nucleu dirixente. Participó activamente na preparación y desendolcu de la Revolución de 1934, tres el fracasu de la insurrección asturiana exíliase a Francia d'onde regresa de forma clandestina en 1936 pa preparar les eleiciones de febreru nes que salió escoyíu diputáu del Frente Popular.

Foi escoyiu diputáu a cortes mientres la II República en 1931, 1933 y 1936. Foi tamién escoyíu alministrador del periodicu socialista Avance. Al españar la Guerra Civil formará parte del Comité del Frente Popular d'Asturies encargándose primero d'Interior y Xusticia, llueu nel Conseyu Interprovincial d'Asturies y Lleón (formáu n'avientu de 1936) y en mayu de 1937 declaráu soberanu, foi Conseyeru de Comerciu y Mines. Tres la ocupación d'Asturies pol exércitu franquista n'ochobre de 1937 exiliaráse a Francia otra vuelta. Morrió en La Paz (Méxicu) l'1 de payares de 1960.

Referencies

1. URL de la referencia: http://www.congreso.es/portal/page/portal/Congreso/Congreso/Iniciativas?_piref73_2148295_73_1335437_1335437.next_page=/wc/servidorCGI&CMD=VERLST&BASE=DIPH&FMT=DIPHXD1S.fmt&DOCS=2-2&DOCORDER=FIFO&OPDEF=Y&NUM1=&DES1=&QUERY=%2838120%29.NDIP.. Data de consulta: 20 xineru 2020.

Enllaces esternos

• Datos: Q13146702