Ali Hussain Kafi (17 d'ochobre de 1928, El Harrouch (es) 
– 16 d'abril de 2013, Xinebra)[3] foi un políticu arxelín, antiguu militante del Frente de Lliberación Nacional (FLN) y presidente del so país ente 1992 y 1994.
Nació nuna llocalidá cercana a la ciudá d'El Harrouch, nuna familia de pequeños llabradores afiliada a la célebre confraternidad musulmana Rahmania. El so padre, Cheikh El Hocine, que s'encargó de la so educación, impartiólu coles mesmes la enseñanza relixosa. En 1946, foi unviáu a una reputada escuela coránica de Constantina, l'Institutu Kettenia. Marcáu poles masacres de Setif de 1945, xuntó rápido a les idees nacionalistes del Partíu del Pueblu Arxelín (PPA) y formó con otros estudiantes una célula militante. Diplomáu como “El Ahlia” en 1950, partió a Tunicia a reforzar la so formación na gran universidá islámica de la Mezquita Zitouna. Ellí frecuentó los medios nacionalistes tunecinos y participó en delles aiciones militantes. Espulsáu de Túnez en 1952, purgó daquella una pena de seis meses de prisión poles sos actividaes.
Militante nacionalista
Una vegada lliberáu, reemprendió les sos actividaes nacionalistes, y foi nomáu docente nuna escuela llibre de Skikda, sostenida pol Movimientu pol trunfu de les llibertaes democrátiques (MTLD). El 1 de payares de 1954, al españar la guerra d'Arxelia, foi contactáu por Didouche Mourad, responsable de la zona II del FLN (norte de Constantina). Intensificó entós la so aición militante en Skikda y xunióse al Exércitu de lliberación nacional (ALN). So les órdenes de Youcef Zighoud, a la cabeza de la wilaya II tres la muerte de Mouras, participó na insurrección de Constantina de 1955, entrando a la llucha armada. N'agostu de 1956, formó parte de la delegación de la wilaya II nel Congresu de La Soummam, que punxo en funcionamientu les estructures alministratives y militares del movimientu independentista. Pasó entós a ser militar, depués coronel, y finalmente comandante de la wilaya de 1957 a 1959. En mayu d'esti últimu añu, formó parte del grupu de diez coroneles encargaos de la organización de les operaciones militares del ALN en Túnez, onde s'instaló hasta la independencia arxelina. Mientres la crisis del branu de 1962, sofitó al Gobiernu provisional de la República arxelina, de Benyoucef Benkhedda, frente al buró políticu del FLN d'Ahmed Ben Bella.
Home políticu
Tres la independencia, foi nomáu embaxador d'Arxelia en dellos países, n'El Líbanu en 1963, en Siria en 1966, en Túnez en 1975 (y, el mesmu añu, representante arxelín na Lliga Árabe daquella instalada na ciudá de Túnez), ya igualmente n'Exiptu, Iraq ya Italia. En 1990 se transfromó en secretariu xeneral de la Organización nacional de Muyaidines (combatientes arxelinos mientres la guerra d'Arxelia).
El 14 de xineru de 1992, tres la destitución del presidente Chadli Bendjedid, l'exércitu punxo en funcionamientu un Altu Comité d'Estáu (ACE), órganu provisional de la xestión del Estáu, y Ali Kafi foi nomáu miembru del mesmu, xunto a Khaled Nezzar, Ali Haroun, Tedjini Haddam y Mohammed Boudiaf, que lo presidía. En plenu “deceniu negru”, el 2 de xunetu de 1992 asocedió a Boudiaf, asesináu, na presidencia del ACE. Asumiendo una actitú cada vez más ardigosa, entamó ensin concertación previa un diálogu colos partíos políticos, polo qu'una conferencia del ACE decidió reemplazalo. Apurrió entós los poderes de xefe d'Estáu a Liamine Zéroual, el 30 de xunu de 1994.
Ali Kafi publicó les sos memories en 2002, nuna obra titulada “Del militante políticu al dirixente militar”, na que vuelve sobre numberoses zones escures de la revolución arxelina”, obra pola que va ser duramente criticáu, sobremanera poles sos revelaciones, xulgaes ofensives, ente otros sobre Abane Ramdane.
Referencies
_-_ribbon_bar.gif){kind=small}
