اوجوستان جاك نيكولاس تييرى Augustin Jacques Nicolas Thierry( بلوا، لوار اى شير، فرنسا، 10 مايو 1795 - باريس، 1856 ) ، مفكر و روائى و مؤرخ فرنساوى من اتباع و تلاميذ سان سيمون. بيعتبر من المؤرخين الرومانتيكيين بسبب تفوقه اللغوى و قدرته على صب رؤيته فى قالب درامى بطريقة تشبه طريقة المؤرخ جيبون. جنب اهتمامه بالتاريخ كان مهتم بالاجتماع و كان بيكتب قصص. بيعتبر كتابه " تاريخ الغزو النورمانى لبريطانيا " Histoire de la Conquête de l'Angleterre par les Normands من احسن الكتب اللى اتناولت الموضوع ده و اعتمد فيه على المراجع الاصليه و عمل جهد جامد فيه كلفه بصره ان بصره فضل يضعف لغاية ما اتعمى بالكامل سنة 1830 ، لكن بعد ما اتعمى فضل نشيط فى دنيا البحث التاريخى لغاية وفاته سنة 1856.
اوجوستان تييرى عاش بعد احداث الثوره الفرنساويه و كان متحمس جداً لمبادئها و عجبه نظام الكومون و هو نظام الحكومه المحليه الاشتراكيه اللى قامت فى باريس وقت الثوره ، و اللى كانت اول تجربه فى تنظيم الحكم على اساس اشتراكى متطرف.
درس اوجوستان تييرى تاريخ عامة الناس او " الطبقه التالته " Tiers-etat و الف كتاب عنه فى اربع مجلدات بعنوان " مجموعة وثائق غير منشوره عن تاريخ الطبقه التالته " Recueil des monuments inédits de l'histoire du Tiers Etat ، فسر فيه التاريخ على اساس انه صراع بين الطبقات و مصالحها ، و شرح فيه ان الطبقه العامله هى اساس الانتاج و مصدر الثروه و انها كانت دايمأ بتكافح ضد الطبقات القويه المستبده عشان توصل لحقوقها ، و هاجم الفكره اللى بتقول ان التاريخ بيصنعه الابطال و عظماء الرجال و قال : " عايزين تعرفو مين بالظبط اللى انشأ مؤسسه من المؤسسات او مين اللى عمل خطة مشروع عظيم ؟ يبقى دورو على اللى كانو محتاجينه ، هما دول اصحاب الفكره الاولى و اللى كان عندهم ارادة العمل عشان يحققوها ، هما اصحاب الفضل فى تحقيقها ". على الاساس ده يبقى وليام الفاتح مش بطل الغزو النورماندىلانجلترا لكن الابطال الحقيقيين هما الزراع النورمان الفقرا اللى عاشو فى شمال غرب فرنسا. حاجتهم للارض هى اللى حركتهم ناحية انجلترا عشان يدورو على مجال حيوى واسع و فى اللحظه دى بس اتزعمهم وليام.
مصادر
حسين مؤنس ، التاريخ والمؤرخين، فلسفة التاريخ ، عالم الفكر ، المجلد 5 ، الكويت 1974
الموسوعة الثقافية ، مؤسسة فرانكلين للطباعة والنشر، القاهرة - نيو يورك 1972
Benet, W.R. : The Reader Encyclopedia , j. W. Arrowsmith, Bristol 1977
The New Encyclopædia Britannica, Micropædia,H.H. Berton Publisher,1973-1974
The New Encyclopædia Britannica, Macropædia,H.H. Berton Publisher,1973-1974
.svg)
