القمص بيشوى كامل

القمص بيشوى كامل
ملف:بيشوى كامل.jpg
معلومات شخصيه
الميلاد	6 ديسمبر 1931   محافظة المنوفيه
الوفاة	سنة 1979 (47–48 سنة)  اسكندريه
مواطنه	مصر
الحياه العمليه
المدرسه الام	جامعة اسكندريه
المهنه	قمص
اللغه الام	اللغه المصريه الحديثه
اللغات المحكيه او المكتوبه	عربى ،  واللغه المصريه الحديثه
موظف فى	جامعة اسكندريه
تعديل مصدري - تعديل

القمص بيشوى كامل ، اسمه الأصلى قبل الكهنوت " سامى كامل اسحق اسعد " (دمنهور، 6 ديسمبر 1931 - اسكندريه، 21 مارس 1979). اتولد فى قريه بشارة حنا مدينة دمنهور فى محافظة البحيره فى مصر. راجل دين مصرى كبير كان كاهن كنيسة مار جرجس فى حى سبورتنج فى اسكندريه. اتفوق فى دراسته و اتخرج من كذا كليه و معهد.

كان صاحب فكرة انشاء حضانات فى الكنايس لأطفال الأمهات اللى بيشتغلوا فيها ، و ساهم فى تأسيس كذا كنسيه فى اسكندريه.

نشئته و تعليمه

كلية الهندسه.

بعد ما خلص الثانويه دخل كلية العلوم جامعة اسكندريه و دخل قسم الجيولوجيا و اتخرج سنة 1951 بتقدير جيد. دخل معهد التربيه العالى للمعلمين و أخد دبلوم تربيه و علم نفس سنة 1952 بتقدير ممتاز و كان ترتيبه الاول على دفعته. اشتغل مدرس كيميا فى مدرسة الرمل الثانويه فى اسكندريه ، و فى سنة 1954 اخد ليسانس اداب فى الفلسفه ، و فى سنة 1956 اخد بكالوريوس العلوم اللاهوتيه من الكليه الاكليريكيه فى اسكندريه و كان الاول على دفعته. اتعين معيد فى معهد التربيه العالى التابع لوزارة التعليم فى اسكندرية سنة 1957 ، و فى سنة 1958 دخل كلية التربيه فى القاهره و أخد دبلوم التخصص فى علم النفس فى اكتوبر سنة 1959.

اهتم سامى كامل بالكنيسه و هو صغير و ابتدا يخدم فى الكنيسه و هو عنده سبعتاشر سنه لما كان لسه طالب فى الجامعه و خدم فى كنيسة السيده العدرا فى محرم بك فى التربيه الكنسيه و كان بسبب دراسته الجامعيه فى مجال التربيه مهتم بتربية الاطفال و كان دايم بيروح الكنيسه كل يوم جمعه و حد. اياميها كانت مدارس الحد موجوده فى المدارس القبطيه اللى حوالين الكنيسه لكن سامى كامل نجح فى انه ينقل خدمة كنايس الحد للكنيسه نفسها و بسبب مجهوداته الكبيره بقى امين سنة للخدمة مع انه كان لسه صغير فى السن.

اتجاهه للرهبنه

فى اواخر ديسمبر 1954 مع فترة صوم الميلاد فكر سامى كامل فى انه يترهبن و اختار دير السريان فى وادى النطرون و ابتدا يجهز نفسه للسفر لكن ابوه عيى فأجل السفر لكن فضل مشتاق للرهبنه فكان بيروح رحلات للأديره من وقت للتانى. و مره و هو فى دير القديس بيشوى دخل المقصورة اللى فيها جسم القديس و قعد يناجيه و يقول : " ياريت أتشرف بإسمك يا أنبا بيشوى " لإنه كان نفسه يترهبن بإسم بيشوى. فى 18 نوفمبر 1959 زار سامى كامل الكرازه البابويه فى اسكندريه مع تلامذته فى التربيه الكنسيه ، و بعد ما باس ايد البابا كيرلس السادس البابا قاله انه اختاره يبقى كاهن و انه حا يرسمه بعد اربع تيام. السبب فى الموضوع ده كان صدفه ان البابا كرليس قبل ما يدخل عليه سامى كامل كان بيتكلم مع الاب الكاهن القمص مينا اسكندر عن موضوع حتة ارض كانت اشترتها البابويه القبطيه فى اسكندريه على خط ترام سبورتنج لبنا كنيسه بإسم " مار جرجس ". لكن البابا قال انه مش ممكن بدا البنا قبل رسم كاهن ليها و فى الوقت ده دخل سامى كامل فقال القمص مينا : " أهو ده اللى ينفع يرعى شعب كنيسة مار جرجس ". اللى حصل كان مفاجاءه لسامى كامل و قال : " بس انا مش متجوز " فرد عليه البابا : " الروح القدس اللى ألهمنى حا يختارلك عروسه ". و اداله يومين فرصه فخرج و راح على مقصورة الست العدرا و قعد يصلى. طلب سامى كامل ايد " انجيل باسيلى " اللى كانت أنسه جامعيه واخده بكالوريوس اقتصاد و علوم سياسيه من جامعة اسكندريه و كانت هى كمان بدها تترهبن لكن الاب مينا اسكندر اتدخل و اقنعها بالجواز من سامى كامل و تمت الخطوبه يوم الخميس 19 نوفمبر 1959 فى حفله صغيره محضرهاش غير اهل العروسه بس. تانى يوم سافر سامى كامل على الدير و استخار الرب فى انه يتجوز و يدخل فى الكهنوت و لا يترهبن اللى كان نفسه فيها. لكن الاب مينا اسكندر راحله و قاله انه شاف حلم ان اكليل اتحط على راسه و مع ضغوط من اللى حواليه اتجوز فى 24 نوفمبر 1959 و شاف اهله العروسه لأول مره فى يوم الجواز.

كاهن كنيسة مار جرجس

ملف:رسامة القمص بيشوى كامل.jpg

رسامة القمص بيشوى كامل

كنيسة القديسين (على الشمال) قدام جامع.

فى 2 ديسمبر 1959 اترشم سامى كامل كاهن بإسم بيشوى كامل على مدبح كنيسة مار جرجس فى سبورتنج فى اسكندريه. فى الوقت ده الكنيسه كانت لسه عباره عن مبنى صغير من الطوب الاحمر اللى مش متبيض و السقف كان قماش من اللى بيستخدموه فى السرادق فى مصر. و اتجهز المدبح عشان يترشم عليه الاب بيشوى كامل. و بعد ما اترشم راح على دير السيده العذراء للسريان و قعد هناك اربعين يوم و دى فتره بيقضيها الكاهن بعد رشامته ، و بعدها رجع اسكندريه عشان يشرف على تكميل بنا الكنيسه اللى خلص بناها و اتكرزت سنة 1968 و بقت من اشهر و اجمل كنايس اسكندريه.

اسكندريه على مر تاريخها قبل ما ينهش التطرف و التعصب الدينى جسم مصر ، مدينه اتعرفت بالتسامح الدينى و الانفتاح عاشت فيها كل الديانات و الاجناس فى سلام مع بعض. خدمات الاب بيشوى كامل امتدت فى نواحى اسكندريه و بقى زى ما يكون كاهن لكل اسكندريه و اسس كنايس تانيه هى :

• كنيسة مار جرجس فى الحضرة
• كنيسة رئيس الملايكه ميخائيل فى مصطفى كامل
• كنيسة الأنبا تكلا هيمانوت فى الابراهيمية
• كنيسة القديس مار مرقس والبابا بطرس خاتم الشهداء فى سيدى بشر
• كنيسة العذراء والقديس كيرلس عامود الدين فى كيلوباترا
• كنيسة الأنبا أنطونيوس والأنبا بيشوى فى اللبان

كنيسة القديس مار مرقس والبابا بطرس خاتم الشهداء اتعرضت لهجوم ارهابى فى 1 يناير 2011 اجرامى وقت احتفال اسكندريه بحلول السنه الجديده.

انجازات و خدمات تانيه

فى نوفمبر سنة 1969 إنتدب البابا كيرلس السادس القمص بيشوى كامل عشان يروح على لوس انجليس فى امريكا عشان يرعى ابناء الكنيسة المصريه القبطيه فى المهجر.

الاب بيشوى كامل كان اول اللى فكروا فى انشاء حضانه لأطفال الامهات اللى بيشتغلوا فى كنيسة مار جرجس و دى حاجه نقلتها عنه كنايس اسكندريه و بعدين اخدت بيها كل كنايس مصر. و هو اللى احيا التقلبد الكنسى القديم بالسهر فى الكنيسه فى ليلة السنه القبطيه الجديده " عيد النيروز " و راس السنه الميلاديه و اتبعت فكرته كل كنايس مصر بعد كده.

اتوفى القمص بيشوى كامل فى 21 مارس سنة 1979 بعد حياه مليانه عطاء و بعد ما عمل انجازات كتيره لخدمة أقباط اسكندريه و مدينة اسكندريه بوجه سنة ، و اتعرف بإنه كان شخصيه طيبه خيره و كان محبوب من الناس.

اعترف المجمع المقدس للكنيسه القبطيه الارتودوكسيه بقداسة القمص بيشوى كامل.