سيد محمد سيد مكاوى اتشهر باسم الشيخ سيد مكاوى ( القاهره ، 8 مايو 1927 - القاهره، 21 ابريل 1997 ) ملحن و مطرب مصرى موهوب اتولد فى حى الناصريه فى السيده زينب فى القاهره فى 8 مايو 1927.
وجهته اسرته لحفظ القرآن بعد ان فقد عينه نتيجة للجهل الطبى ايام زمان و تعلم الانشاد الدينى فبقى يقرا قرآن و يأدن فى جوامع ابو طبل و الحنفى فى حى الناصريه. بعد ما دخل سن الشباب بقى يتابع اساطين الانشاد و التلاوه و يتعلم منهم و يقلدهم و ساعدته امه على كده فكانت بتشترى له اسطوانات قديمه من بتوع الروبابيكيا ، و اتعرف على اتنين صاحبهم هما اسماعيل رأفت و محمد رأفت و كانو من ولاد الاغنيا و بيحبو المزيكا و واحد فيهم كان بيعزف ع الأنون و التانى ع الكمنجه ، و كونو هما التلاته تيريو و بقو بيشاركو فى حفلات المعارف و الصحاب.
اتقدم سيد مكاوى للجنة الاذاعه المصريه عشان يختبروه كمغنى فنجح فى الاختبار واعتمد و غنى اول اغنيه و كان اسمها " محمد " من الحان عبد العظيم عبد الحق. و بعدها غنى كمان اغنيه لأحمد صدقى و لحنلمحمد عبدالمطلب تلت اغانى هما " اتوصى بيا " و " قلت لابوكى عليكى و قالى " و " كل مرة لما أواعدك " و عمل اغنيهلشريفة فاضل اسمها " مبروك عليك يا معجبانى يا غالى " و اغنيهلليلى مراد اسمها " حكايتنا احنا الاتنين " ولشاديه عمل " هوى يا هوى ياللى انت طاير " ولنجاة الصغيره " لو بتعزنى " ولصباح " انا هنا يا ابن الحلال "لطيفة "عندك شك ف اية".
سيد مكاوى كان ليه الفضل فى ابتكار مقدمات غنائيه لمسلسلات الراديو و التلفزيون المصرى و لحن مقدمات كتيره لمسلسلات مشهوره زى " شنطة حمزه " و " رضا بوند " و " عمارة شطاره " و غيرها.
الراديو المصرى قدم فى شهر رمضان حلقات اسمها " المسحراتى " بيلحنها كذا ملحن و ادو سيد مكاوى تلت حلقات فقدمها بالطبله من غير فرقة مزيكا و نجحت جداً فإدوله كل حلقات رمضان اللى بعده.
شارك سيد مكاوى فى احتفالات مصر الوطنيه بالغنا و التلحين و كانت ليه تلت محطات فنيه مهمين فى مسيرته الفنيه مع صلاح جاهين فى اوبريت الليله الكبيره و الرباعيات و مع ست الغنا المصرى ام كلثوم بتلحينه ليها اغنية " يامسهرنى " و لحن ليها اغنيه تانيه اسمها " اوقاتى بتحلو " اللى كانت المفروض تغنيها لكن اتوفت قبلها.
كرمته مصر بوسام العلوم والفنون من الدرجه الأولى ، و اتوفى فى 21 ابريل 1997 و ساب لمصر تراث فنى جميل و اصيل.
