الامبراطوريه اللاتينيه فى قسطنطينيه او الامبراطوريه اللاتينيه قسطنطينيه ( Latin Empire of Constantinople )، امبراطوريه اقطاعيه عاشت من 1204 ل1261. اسسها قواد الحمله الصليبيه الرابعه على نموذج مملكة بيت المقدس اللاتينيه بعد ما استولو على قسطنطينيه. هدف الحمله الصليبيه الرابعه اللى قادها انريكو داندولو كان مهاجمة مصر و القضاء على قوتها و بعد كده التوجه لبيت المقدس لتحريره من المسلمين. لكن الحمله دى عمرها ما وصلت مصر و لا بيت المقدس لان دونادولو راح بيها على القسطنطينيه عاصمة البيزنطيين المسيحيين ، و عملت فيها فظايع و قتلت اعداد كبيره من سكانها المسيحيين و مانجاش منهم غير اللى قدرو يهربو و نهبتها هى و كنايسها و استولت عليها فى 16 مايو 1204 و نصبت عليها امبراطور كاتوليكى من نبلا اوروبا هو الكونت بالدوين دى فلاندر Baudouin de Flandre و اسست الامبراطوريه اللاتينيه قسطنطينيه على انقاضها.
شملت المملكه اللاتينيه شبه جزيرة البلقان و جزر الارخبيل اليونانى و كانت تابعه ليها مملكة سالونيك و امارة اخايا و اقطاعيات تانيه. هاجمها ملوك امبراطورية نيقيا البيزنطيين ، اللى اتحالفو مع مصر ، و حكام ابيروس و البلغار و الترك و استردها ميخائيل التامن بالايولوجوس سنة 1261 و رجعها للامبراطوريه البيزنطيه لكن ڤينيسيا فضلت مسيطره على اكتر الجزر اليونانيه و خضعت اتينا لكتالونيا و فضلت اخايا تحت سيطرة عيلة فيلاردوان.
