استروبيولوجيا

استروبيولوجيا
بيولوجيا ، وفلك
تعديل

المسح الميكروسكوبى الاليكترونى للنيزك المريخى ALH84001 بين وجود تكوينات ممكن تكون اشكال بدائيه للحياه

الاستروبيولوجيا او الزينوبيولوجيا او الايكسوبيولوجيا (بالانجليزى: Astrobiology or Xenobiology or Exobiology) هو علم جديد من فروع علم البيولوجيا بيهتم بدراسة الاصل و التطور ، و الانتشار و المستقبل بتاع الحياه فى الكون الواسع . الاستروبيولوجيا علم بيتسند على كذا علم تانى زى الفلك و البيولوجيا و الكيميا و الفيزيا و هدفه هو التدوير على اماكن ممكن يكون فيها حياه سواء فى النظام الشمسى او فى الكواكب التانيه بره المجموعه الشمسيه.

وكالة ناسا

وكالة ناسا للفضاء اهتمت بموضوع الاستروبيولوجيا من الخمسينات و نتيجه لزيادة كمية المعلومات المتوافره عملت برنامج سنة 1996 بيحاول يلاقى اجابات على تلات اسئله اساسيه :

1. ازاى ابتدت و اتطورت الحياه
2. يا ترى فى حياه بره كوكب الارض ، و اذا كان فى ، ازاى نقدر نكشتفها.
3. ايه هو مستقبل الحياه على كوكب الارض و فى الكون كله.

اول مشروع للاستروبيولوجيا تموله ناسا كان سنة 1959 و بعتت سنة 1976 المركبه الفضائيه فايكينح للمريخ و قامت بتلات تجارب بيولوجيه بهدف التدوير على اى شكل محتمل من اشكال الحياه ممكن يكون على سطح الكوكب الاحمر.

شروط الحياه

بيعتقد العلما ان الحياه (اللى بتشبه حياتنا) عشان تتواجد فى اى مكان لازم يتوفر فى المكان دا شوية شروط اهمها ان الكوكب دا تكون درجة حرارته متوسطه يعنى دافى ب تتواجد المايه على سطحه فى حالتها السايله و مايكونش سخن قوى لدرجة ان المايه دى تتبخر (زى كوكب فينوس مثلا). الشرط التانى انه يكون فيه عناصر مهمه للحياه زى الكاربون و النيتروجين اللى وجودهم اساسى فى تركيب الخليه الحيه. الشرط التالت هو استقرار الكوكب و ثبات حالته لمده طويله تسمح للحياه انها تتكون و تتطور ، فى بعض الكوكب اللى بتتعرض كل شويه لنيازك عملاقه مدمره بتتسبب فى تبخير المايه اللى على سطحها و دا ما بيديش فرصه لنشوء الحياه على سطحها. الشروط التلاته دى بتتوافر على كوكب الارض و عشان كدا لحد دلوقتى هى الكوكب الوحيد اللى قدر يوفر الظروف المناسبه لنشوء الحياه و تتطورها. المريخ كانت موجوده على سطحه مايه سايله فى وقت من الاوقات و بيرجح بعض العلما انه ممكن يكون ظهرت عليه اشكال بدائيه من الحياه (الباكتيريا مثلا) و اللى بيأكد نظريتهم هو نيزك وقع من المريخ على كوكب الارض فى انتاركتيكا (اسمه ALH84001) و لقو العلما فيه اشكال بدائيه من الباكتيريا. الاحتمال التانى على وجود الحياه بيتركز على واحد من الاقمار اللى بتلف حوالين جوبيتر اسمه قمر يورويا ، فى ادله بتأكد وجود مايه سايله تحت السطح بتاعه و بيعتقد العلما ان الظروف هناك ممكن مناسبه لشكل او تانى من اشكال الحياه البدائيه.

الاستروبيولوجيا و الخرافات

الوش اللى صورته مركبة الفايكينج 1 سنة 1976 على كوكب الريخ اتضح انها صوره ل تل و صفها عالم فى ناسا بانها خدعه بصريه من الضوء و الظلال

الاستروبيولوجيا من العلوم الطبيعيه اللى بتتبع مناهج البحث العلمى الرصين و مالهاش علاقه بالخرافات بتاعة الكائنات الفضائيه او الاطباق الفضائيه (UFO)و علاقتهم ببناية الاهرام المصريه مثلا.وكالة ناسا يتنفى زيارة اى مخلوقات فضائيه لكوكب الارض فى الماضى القريب او البعيد و بتأكد انه لحد النهارده مافيش اى دليل قاطع على وجود الحياه الذكيه بره كوكب الارض بس عدم وجود الدليل لحد دلوقتى ما بينفيش الاحتمال.

لينكات برانيه

• الاستروبيولوجيا على موقع وكالة ناسا

فيه فايلات فى تصانيف ويكيميديا كومونز عن:

استروبيولوجيا