نيپًال، رسميا لجمهورية الديموقراطية لفيديرالية د نيپّال (بالنيپّالية: सङ्घीय लोकतान्त्रिक गणतन्त्र नेपाल) هي بلاد ماكاطلش على لبحر جات ف لجنوب د آسيا، و بالضبط ف الجبال د لهيمالايا. تاتحدّها من الشمال الشينوا، و من لجنوب و الشرق و لغرب لهند. نيپًال عندها جغرافيا متنوعة، فيها السهول ولغابات والجبال. 8 من أعلى 10 د الجبال ف لعالم جاو فيها، منهم الجبل ديال إيڤريسط، اللي هو أعلى جبل ف لعالم. لبلاد معزولة من الناحية د التضاريس ديالها و الطرقان اللي صعيبة فيها. فيها 4 ديال لأقاليم و 14 لمقاطعة و 75 ناحية.
نيپًال بلاد عندها تاريخ قديم و فيها تولد لمؤسس ديال لبودية. لبلاد كانت فيها مملكة لوقت طويل، و ماعمرها ماتستعمرات، حيت كانت خدّامة فالتوازن ما بين الشينوا و لهند. ف 2001، وقعات مجزرة كبيرة ف لبلاد ملّي لأمير د لبلاد قتل بّاه و مّو و 7 د الناس من لأسرة لملكية، و موراها نتاحر. دخلات لبلاد موراها ف حرب أهلية سالات ف 2008 ولاّت فيها جمهورية علمانية، و سالات آخر مملكة هندوسية كانت ف لعالم.[1]
تيسكنو ف نيپًال شويا كتر من 28 مليون د الناس، و لعاصمة ديالها و أكبر مدينة فيها هي كاطماندو. اللغة الرسمية د لبلاد هي النيپًالية، و لفلوس اللي كاتخدّم هي الروپية النيپًالية. هي داخلة ف لأمم لمتحدة من 1955، و فيها لمقر ديال الرابطة د جنوب آسيا د التضامن لجهوي.
تصاور من لبلاد
- نيپًال
-
كاطماندو
-
بودالنيلكانطا
-
باكطاپور
-
پاطان
-
لهيمالايا
-
موسطانݣ
-
الروز
-
لمركوب
عيون لكلام
