ناميبيا، رسميا لجمهورية د ناميبيا (بلينݣليزية: Republic of Namibia) هي بلاد جات ف لجنوب لغربي د إفريقيا. تايحدّها من لغرب لمحيط لأطلسي، من الشمال أنݣولا و زامبيا، من الشرق بوطسوانا، و من لجنوب جنوب إفريقيا. ناميبيا ما عندهاش حدود مع زيمبابوي، واخا بيناتهم غي 200 ميطرو، حيت جات بيناتهم بوطسوانا، اللي خدات هاداك الطرف د لواد د الزامبيزي.
لأراضي د ناميبيا كانت مسكونة من شحال هادي من بزاف د لقبايل منهم السان و الدامارا و الناما. ف لقرن 14، جاو قبايل خرا من لبانطو (ف لوقت د لهجرة د لبانطو) اللي تاهوما سكنو ف لمنطقة، و ولاّو هوما لأغلبية د السكان. ف 1884، ستعمرات ألمانيا لمنطقة، و بقات فيها تال مورا لحرب لعالمية اللولا. ف 1920، عطات لعصبة د لأمم لحكيم د لبلاد لجنوب إفريقيا، اللي حتلاّتها و طبقات فيها النضام د التفريق لعنصري (لأپارتهايد)، اللي كان مطبّق تا فيها. من مورا حرب بداوها الناميبيين، خدات لبلاد لإستقلال ديالها نهار 21 مارس 1990.[1] دارت لبلاد الدستور ديالها ف نفس لعام، والنضام د لحكيم ديالها جمهوري.
تيسكنو ف ناميبيا شويا كتر من 2.5 مليون د الناس، و لعاصمة ديالها هي ڤيندهوك. اللغة الرسمية هي لينݣليزية، و عاد كاين 13 لغة وطنية ولا جهوية. لفلوس اللي كاتخدّم ف لبلاد هي الدولار الناميبي، و لأغلبية د الناس (ما بين 80-90%) مسيحيين. ناميبيا داخلة ف بزاف د لمنضمات دولية بحال لأمم لمتحدة و لإتحاد لإفريقي و لكومنويلت و لمجموعة د التنمية د إفريقيا لجنوبية.
اللغات
قبل 1990، كانت ناميبيا فيها تلاتة د اللغات رسمية هوما لينݣليزية و لألمانية و لأفريكانز. ملّي ستاقلات لبلاد من جنوب إفريقيا، حيّدات الرسمية من لألمانية و لأفريكانز، اللي كانو محسوبين لغات د لإستعمار، و عندهم علاقة بلأپارتهايد، و بقات غي لينݣليزية اللي رسمية ف لبلاد.
من غير اللغات لأوروپية، لبلاد تاتعتارف ب 10 د اللغات إفريقية يا إما لغات وطنية، و لا جهوية.[2] أكبر وحدا فيهم هي اللغة ديال أوشيوامبو، اللي تيهضروها تقريبا النص د السكان د لبلاد.
عيون لكلام
