Uellos Negros (Ojos Negros en castellano) ye un municipio de la provincia de Teruel (Aragón), situau en la comarca de lo Xiloca y partiu chudicial de Calamocha.
La suya población ye de 510 habitants (2009), en una superficie de 90,71 km² y una densidat de población de 5,62 hab/km².
Cheografía
Ye situau en la costera norte de la Sierra Menera. Tien chacimientos de fierro en unas piedras calsineras d'edat siluriana a on se concentroron minerals d'este elemento por estar insolubles.
Mugas
Lo suyo termin muga con Setiles, El Pedregal, Pozuel, Mont-reyal, Villafranca y Villar del Salz.
Historia
Bi ha poblaus celtibers relacionaus con l'aproveitamiento de lo fierro de la zona.
Seguntes Agustín Ubieto Arteta, la primera cita de lo lugar ye en 1294, recollida en a obra de Toribio del Campillo Documentos históricos de Daroca y su Comunidad (Zaragoza, 1915).[1] Este autor no teneba conoixencia que Uellos Negros ye nombrato en Rationes decimarum Hispaniae (1279-80): Aragón y Navarra, a on bi n'ha citas por lo menos catorce anyadas mes antigas.
En 1903 se construyó la via ferria entre este lugar y lo puerto de Murviedro (a on dimpués serían los Altos Fornos de Murviedro), estando lo ferrocarril privau con recorrido mas largo d'Europa.
En 1987 desapareixió l'actividat industrial en los Altos Fornos de Murviedro y cerroron las menas.
Toponimia
La forma aragonesa y mozarabe d'este toponimo ye Uellos Negros, y la trobamos en Rationes decimarum Hispaniae (1279-80): Aragón y Navarra:
Item rectore de Vuellos Negros, nichil quia exemplus est.
Bi n'ha dos citas aproximativas que se pueden interpretar como Uellos Negros:
- La primera ye la forma Ollosnigros, d'un texto de 1205 adhibiu en lo Libro vermello de l'Archivo Colechial de Daroca. En ixe texto lo bispe de Zaragoza Remón de Castrocol adchudica las decimas y primicias de cada lugar a cadaguna de las ilesias de Daroca. La transcripción que en fa l'archivero Agustín Gil Domingo ye Ollonigres, pero en ixa transcripción tamién bi ha traduccions a lo castellano y probables errors tipograficos. Tamién n'ixe texto trascrito por dos autors bi ha muitos nombres latinizatos y sin de diftongo romance: Cobas, Corbo, Ferrerola, Fontesclaras, Cerberolla, Laguerola, Sarcolla, Villanova, por lo que ye fácil que la forma Ollosnigros, que presenta trazas latinas en nigres, podió tener diftongo -ue-, y representar una forma tipo Uellos negros.
Clerici et ecclesia Sancti Dominici habent
Allueva,
Fuentfrida,
Losella,
Bea,
Noros,
Pardellos,
Corberola,
Vello,
Castelpedrés,
Losella,
Gallocanta,
Ollosnigros,
Pozuel.
- La segunda ye d'un texto medieval de 1284 relativo a lo Sitio d'Albarracín s'escribe Huylos Negros. Cuan bels hombres de Chuan Núñez entroron en lo lugar y se levoron un botín de bestiar y atras cosas ta Peracens.
Alcaido de Pierafelz o eis locum tenenti. Avemus entendido que
almugavares e homines de don Johan Nunnez corrieron a
Huylos Negros e en alcunos otros lugares nuestros e levaronse ganados
En la mayor parte de los textos medievals s'escribe Oios Negros, Ojos Negros, Oxos Negros, etc... que s'han d'interpretar dende a grafia aragonesa y navarra como "Ochos Negros". Agustín Ubieto Arteta unicament conoixe las formas Ojos Negros y Oyos Negros.[1]
Ye probable que la forma "Uellos Negros" se perdese pronto a causa d'estar en la muga con Castiella, reino que teneba una mayor tradición de fer servir por escrito lo suyo romance escrito y a on enantes se creyó un estándard que influyó en la traza d'escribir en Aragón. D'esta traza lo estándard escrito en Aragón (dito scripta aragonesa) imitaba trazas castellanas y evitaba ciertos rasgos aragoneses, que yeran consideratos vulgarismos y remataban cayendo en desuso. Por atra parte as comunidaz aragonesas recibiban un fluxo d'inmigración castellana, y l'aragonés d'as comunidaz aragonesas no teneba ciertos caracters caracteristicos de l'aragonés de la Val de l'Ebro y Alto Aragón.
Demografía
Administración
Reparto de concellers
Alcaldes
Puestos d'intrés
Fiestas
Bibliografía
Veyer tamién
Referencias
Vinclos externos
.svg){kind=small}
