The Deadly Companions (títol orichinal en anglés, en aragonés Os companyeros mortals, enguerada en Aragón con o suyo títol traduciu enta lo castellano como Compañeros mortales) ye una cinta de cine estausunidense de cine de western de l'anyo 1961 dirichida por Sam Peckinpah seguntes un guión adaptau por A. S. Fleischman (basau en The Deadly Companions, una novela d'A. S. Fleischman), con una banda sonora orichinal de Marlin Skiles, una dirección de fotografía de William H. Clothier y una producción cinematografica de Charles B. Fitzsimons ta la productora cinematografica Carousel Productions. L'elenco d'actors d'a cinta, en os suyos papels prencipals, lo forman Maureen O'Hara, Brian Keith, Steve Cochran, Chill Wills, Strother Martin, Will Wright, Jim O'Hara, Peter O'Crotty, Billy Vaughan y Big John Hamilton, entre d'atros.
Kit Tilden ye una vídua, propietaria d'un "saloon" en un lugar de l'ueste d'Estaus Unius, y cuan Yellowleg, Turk y Billy fan un atraco en un banco d'o lugar, lo primero mata accidentalment a su fillo. Kit, a qui los suyos vecinos creyen que mai no s'ha casau, decide denterrar o cuerpo de su fillo chunto con su pai. O problema ye que ixe lugar se troba en ixe momento albandonau y en bel meyo de territorio controlau por os apaches, asinas que entre ixo y que no creyen que mai no haiga existiu ixe presunto mariu, denguno no quiere acompanyar´la en ixe perigloso viache. Cuan ye en marcha, troba a la banda d'asaltants, y Yellowleg, sentondo-se culpable d'a muerte d'o nino, decide aduyar-la en o viache, encara que ella no quiere, y obliga a los atros miembros d'a banda a marchar con él. Yellowleg heba estau sarchento en l'exercito estausunidense mientres a Guerra Civil d'os Estaus Unius, y cuan Billy, un pistolero, agrede a Kit, lo chita d'o grupo. Bien luego tamién l'albandona Turk, que ye un desertor de l'exercito d'os antigos Estaus Confederaus d'America, ta unir-se a Billy, pero forzaus por a presencia d'os apaches, siguen os pasos de Kit y Yellowleg y los troban chusto cuan éls acaban de trobar a tomba d'o mariu de Kit, que mientres o viache ha prencipiau a sentir atracción por Yellowleg, atracción que ye mutua.
A cinta s'ambienta en Arizona en os anyos 1870 y las suyas escenas se filmoron en Tucson y cuantas atras localidaz en Arizona.[2]
Se veiga tamién
Referencias
Vinclos externos
