La sierra d'el Tremedal ye una aliniación montanyosa de dirección NNW-SSE adintro de la serranía d'Albarracín y de la branca castellana[1] de lo Sistema Iberico. Destaca por los afloramientos de rocas paleozoicas plegadas en la orochenia herzinica[1][2] y erosionadas formando un releu apalachián[3].
Se situa a lo sud con las Parameras de Pozondón, que la desparte de la sierra de Sant Chinés y a l'ueste y norte de la sierra d'Albarracín sensu stricto, que la desparte de la sierra Carbonera u macizo de Sierra Carbonera.
Toponimia
L'oronimo sierra d'el Tremedal se relaciona con la Ermita d'el Tremedal, y devez ye relacionau con las paúls acidas que bi ha. En aragonés medieval ye documentada la parola tremedal, manimenos actualment en lo castellano comarcal la denominación popular gotiales[4][5].
En un texto de l'Archivo municipal d'Exea d'Albarracín de 1486 referiu a un habitant de Bronchales y escrito en aragonés local bi ha una referencia a la part de la sierra a on que ye la ermita como Alto de Oriuela:
Item, dexo más sobre el dito molino Ja fanega de farina cada hun anyo para los que yrán en la procesyón la biéspera de Sant Johan a
Santa María la Vyeja del alto de Oriuela, la qual sea tovido de dar en cada hun anyo aquel que será senyor del molino, que la fagan tortas en la fuent El Canto;
[6]En cheolochía recibe la denominación de Macizo d'el Tremedal. Esta sierra ye considerada en cualques descripcions cheograficas como part de la Sierra d'Albarracín. En tot caso tanto la Sierra d'Albarracín y la Sierra d'el Tremedal fan part de la Serranía d'Albarracín chunto con atras sierras de la redolada.
Principals altarias
Las principals altarias son Caimodorro con 1.920 m, San Cristóbal con 1.862 m y Sierra Alta con 1.855 m. Se puet travesar la sierra d'el Tremedal por lo Puerto d'Oriuela, situau a 1650 m d'altaria sobre lo livel d'a mar a l'este de Caimodorro, a l'ueste de Cuesta Pelada (1.887 m) y Puntal de Centella (1.851 m), y a lo norte de la fuent Majada las Vacas, a on que naixe l'arroyo de la Garganta u barranco de la Garganta.
Hidrolochía
La versant norte desaugua enta lo río Gallo, afluent de lo Tacho, la versant sudueste lo fa enta lo barranco d'El Puerto u río de la Hoz Seca, (tamién afluent de lo Tacho), y la versant sudeste enta lo río Garganta, afluent de lo río Guadalaviar.
Superficie por municipios y comarcas
Buena part de la Sierra d'el Tremedal perteneixe a los municipios de Noguera d'Albarracín, Bronchales y Oriuela en la provincia de Teruel, y a Orea en la provincia de Guadalachara, despartius toz por "mangas" de lo termin municipal d'Albarracín.
Cheolochía
Los principals materials cheolochicos representaus en lo macizo paleozoico d'el Tremedal son las cuarcitas armoricanas, las losetas y grauwacas de lo Llandeilo y las cuarcitas de lo Valentiniense inferior[7].
Bi ha una representación chica de porfidos tardiherzinicos.
Cheomorfolochía
En las zonas alomadas de lo cabalto d'esta sierra quedan restos de la plana d'erosión intramiocena[8] de lo Sistema Iberico.
En la glaciación de Würm la Sierra d'El Tremedal yera tot adintro de lo sistema morfoclimatico periglacial, con formación de tarteras, ríos de piedras y grèzes litees.
Referencias
- ↑ 1,0 1,1 (es) Julio Muñoz Jiménez, Concepción Sanz Herráiz: Guía Física de España. 5 Las Montañas. Alianza Editorial, 1995, p 144, p 169.
- ↑ (es) Instituto Geológico y Minero de España: Libro Jubilar J.M.Rios. Geología de España Tomo I. Instituto Geológico y Minero de España, 1983.
- ↑ (es) Jose Luís Peña Monne et al. : Geomorfología de la Provincia de Teruel. Instituto de Estudios Turolenses, 1984. pp 49-51.
- ↑ (es) Pedro Manuel Artigot Martínez (coordinador): Red natural de Aragón. nº 20, Sierra de Albarracín Prames, 2007. p 61
- ↑ (es) José Manuel Vilar Pacheco: Lexico y cultura popular de la Sierra de Albarracín. Centro de Estudios de la Comunidad de Albarracín, 2008.
- ↑ (es) Juan Manuel Berges Sánchez, Raúl Ibáñez Hervás: El culto a la virgen del Tremedal. CECAL. 2012, p 244.
- ↑ (es) Mateo Gutiérrez Elorza, José Luis Peña Monné: Las formas del relieve de la provincia de Teruel. "Cartillas Turolenses Nº 7º". Instituto de Estudios Turolenses, 1990. p 29.
- ↑ (es) Mateo Gutiérrez Elorza, José Luis Peña Monné: Las formas del relieve de la provincia de Teruel. "Cartillas Turolenses Nº 7º". Instituto de Estudios Turolenses, 1990. p 25.
Bibliografía
- (es) Julio Muñoz Jiménez, Concepción Sanz Herráiz: Guía Física de España. 5 Las Montañas. Alianza Editorial, 1995.
- (es) Pedro Manuel Artigot Martínez (coordinador): Red natural de Aragón. nº 20, Sierra de Albarracín Prames, 2007.
- (es) Instituto Geológico y Minero de España: Libro Jubilar J.M.Rios. Geología de España Tomo I. Instituto Geológico y Minero de España, 1983.
- (es) Liñán, Eladio, Villas, Enrique, Gozalo, R: El Paleozoico de Teruel, articlo publicau en Introducción a la geología de la provincia de Teruel, Instituto de Estudios Turolenses, 1991.
