Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.
A seu d'a Santa y Indivisible Trinidat de Bristón, u seu de Bristón (The Cathedral Church of the Holy and Undivided Trinity en anglés), ye una seu bispal situata en a ciudat anglesa de Bristón, en a rechión d'o Surueste d'Anglaterra y condau de Bristón. A seu, que fue construyita en os sieglos XII-XIV, ye en estilo normando, un estilo romanico propio de territorios colonizatos por os normandos, de transición entre o romanico y o gotico, encara que mas amanato a o primer d'istos estilos.
L'edificio ye actualment d'a Ilesia anglicana, y ye a seu d'a diocesi de Bristón, establita en 1542 por os anglicanos. Sindembargo, a fundación yera anterior, y yera en realidat l'edificio principal d'un monesterio establito en 1140.
L'edificio d'a seu fue construyito en 1140 con o nombre de St Augustine's Abbey u abadía de San Agustín, por Robert Fitzharding, un rico hombre local, que tamién fació construyir o castiello de Berkeley ta esfender os accesos ta Bristón y o estuario d'o río Severn. D'entre o sieglo XII se bi construyoron nuevos edificios de piedra, toz en estilo normando (nomás bi ha actualment a casa abacial y a sala capitolar, a mas d'una puerta d'estilo romanico que yera en as cambras de l'abat).
En 1216-1234, con o abat Dabid, se construyó a capiella de lady Elder (1220). En 1298-1332, con l'abat Edward Knowle se reconstruyó a parte oriental de l'abadía. L'abat John Newland (1481-1515) escomenzó a reconstrucción d'a nau, encara que ista reconstrución restó incompleta en 1539, cuan os anglicanos proclamaron a disolución d'as órdens monasticas, y a nau fue enderrocada.
En o sieglo XIX s'anyadió una nueva nau, disenyata por l'arquitecto George Edmund Street. Ista nau yera armoniosa con o conchunto arquitectonico medieval, y a ceremonia d'inauguración d'a nau estió o 23 d'octubre de 1877, encara que a portalada occidental con as suyas torres chemelas no se remató dica 1888.
