Serranías de Gúdar

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.
Envista de sierras y vals de las serranías de Gúdar dende la val de las Defesas de Fortanet, baixo la sierra de la Rocha de las Defesas.

Serranías de Gúdar[1] u zona central subtabular[2] ye una unidat morfoestructural de lo Sistema Iberico definida en buena part de las provincias de Teruel y Castellón, en la branca levantina d'este sistema montanyoso. Son un conchunto d'aliniacions montanyosas se materials mayoritariament cretacios plegaus en dirección Norte-Sud en la zona septentrional y Norueste-Sudeste en la meridional. Estas aliniacions se gosan situar por dencima de los 1.000 m d'altaria y son despartidas por las vals de ríos de las cuencas hidrograficas de Millars, Alfambra y Guadalop, que con lo suyo encaixamiento fluvial las individualizan. Bi ha un important sulco formau por las vals de Sollavientos y Vacas.[3]

Sobre tot en las marguins, bi ha bella cuenca sedimentaria chica d'edat neochena vuidada por l'acción erosiva de lo ret fluvial.

Las serranías de Gúdar son en contacto con lo macizo de Chabalambre y la depresión de Sarrión a lo sud, a l'ueste con la fuesa d'Alfambra, a lo norte con las serranías de Sant Chust-Castellot,[1] y a l'este con las fuesas prelitorals de Castellón.[4]

En lo modelau d'estas serranías destaca la presencia de la superficie d'erosión fundamental de lo Mioceno superior, lo modelau karstico, lo modelau periglacial y los glacis y faixas fluvials.

Se distigue diferents subunidaz estructurals, que pueden agrupar-se de diferents trazas seguntes los autors.

Sierra d'Escoriuela - sierra de los Cabezos

Se presenta a lo norte de la sierra de Camarena, entre la fuesa d'Alfambra a l'ueste y la depresión d'El Pobo-Cedriellas. Presenta caracters pareixius a la sierra de Camarena (que ye en lo macizo de Chabalambre), con los mesmos materials triasicos y churasicos. Estos materials forman un anticlinorio verchent enta l'ueste. Bi ha una buena representacion de la superficie d'erosión fundamental, lo que da un aspecto de cantimplano, a on que destaca lo cabezo residual de Castelfrío. Adintro d'esta unidat se troba la depresión de Corbalán. Son sierras d'esta unidat la sierra d'Escoriuela, la sierra de los Cabezos y la sierra Gorda.

Depresión d'El Pobo-Cedriellas

Envista de la depresión d'El Pobo-Cedriellas en Fababuix.

Ye una estructura sinclinal erosionada situada a l'este de la sierra d'Escoriuela, con restos de materials cenozoicos d'una cuenca sedimentaria vuidada por la formación de los rez fluvials d'Alfambra a lo norte y de Cedriellas a lo sud.

Sierra de Gúdar - muela de Camariellas

Envista d'un prau en Val de Linars con la sierra de Mont Negro formando la versant oposada de la val.

Son aliniacions montanyosas y muelas feitas sobre plegos de dirección N-S en materials cretacios inferiors que se tuercen enta una dirección NW-SE. Las altarias mes grans se troban en lo sector sud en la sierra de Mont Negro, las menors en lo norte. La val alta de Guadalop aproveita un plego anticlinal destripau (anticlinal de Miravet), que representa la marguin oriental de la unidat.

Destaca la formación de muelas en sinclinals pendius con cinglos d'edat aptiana: muela de Camariellas, muela d'Exorcas, muela de Gúdar, cerca d'atras plataformas menors conoixidas como las Molatillas u las Moratillas.

Sinclinal de Fortanet

Son aliniacions montanyosas en las marguins de lo sinclinal de Fortanet: a l'ueste la sierra de la Lastra, a lo sudueste la sierra de Sollavientos, a lo sudeste Pinar Ciego, la sierra d'el Rayo y la sierra de la Rocha de las Defesas, y a l'este la sierra de la Canyada. Dende lo sinclinal enta lo sud lo capuzamiento se va tornando cada vegada mes horizontal, enta l'este y l'ueste se troban los plegos anticlinals de Canyada y Miravet, con importants cinglos de calizas aptianas.

Sierra de Mayabona

Envista de La Sampola[5] en una versant de la sierra de Mayabona.

Son aliniacions montanyosas de lo sud de lo sinclinal de Fortanet pareixidas a las anteriors pero con dirección SW-NE que desparten la depresión de Puertomingalbo y Vistabella de la depresión de Mosqueruela, las dos con poljes y desauguadas por lo río Monleón.

Plataformas de Cantaviella-Tronchón

Envista de la sierra de Palomita con la muela de Monchén.

Son plataformas estructurals subhorizontals con cinglos en lo cabalto formaus por calsineras cenomanianas (Cretacio superior). Estos cinglos cenomanians y los morrons aptians de calsineras de facies Urgon destacan muito topograficament por una erosión diferencial relacionada con lo encaixamiento y la erosión regresiva de lo ret fluvial de los ríos de Cantaviella y Palomita.[1][6] Enta lo norte bi ha una transición enta las serranías de Sant Chust-Castellot cerca de la sierra Carrascosa y lo tramo de dirección Ueste-Este de Guadalop entre Aliaga y Castellot.

Destacan la sierra de la Palomita u muela de Monchén y la muela Mujer.

Sierra d'el Chaparral - sierra de Nogueruelas

Las sierras d'el Chaparral, Mora y Nogueruelas son formadas por plegos de dirección NW-SE y con altarias por dencima de los 1.700 m. Lo cabalto ye formau por calsineras aptianas que en la part oriental desparten las cuencas hidrograficas de Millars y Linars, a diferencia de la part occidental travesada por lo río d'Alcalá.

Depresión de Rubiuelos de Mora

Envista de Rubiuelos de Mora en la marguin oriental de la fondada de Rubiuelos.

Ye una fondada tectonica a lo sud de las sierras de Mora y Nogueruelas que s'ha plenau con sedimentos terrichenos y carbonataus d'edat Miocena y que en part han estau erosionaus por l'acción de los ríos que baixan en dirección Norte-Sud enta Millars: río de Mora, río de la Pila y río de Rubiuelos y traviesan la fondada de Mora a l'ueste y la fondada de Rubiuelos a l'este.

Referencias

  1. ↑ 1,0 1,1 1,2 (es) José Luis Peña Monné et al. : Geomorfología de la Provincia de Teruel. Instituto de Estudios Turolenses, 1984. pp 80-91.
  2. ↑ (es) Teófilo Sanfelíu Montolío: Relieve, publicau en lo libro La provincia de Castellón de la Plana, tierras y gentes. Caja de Ahorros y Monte de Piedad de Castellón, 1985. pp 19-25.
  3. ↑ (es) José Luis Peña Monné, Luis Alberto Longares Aladrén, Marta Espinalt Brillas: Paisajes naturales de la provincia de Teruel. Guía del medio natural. Instituto de Estudios Turolenses, 2000. ISBN 84-86982-97-9. pp 103-104.
  4. ↑ (es) Mateo Gutiérrez Elorza, José Luis Peña Monné: Las formas del relieve de la provincia de Teruel. "Cartillas Turolenses Nº 7º". Instituto de Estudios Turolenses, 1990. pp 39-41.
  5. ↑ (es) José Castillo Gil: La toponimia oral de las elevaciones macizas de Puertomingalvo (Gúdar-Javalambre, Aragón) y su rotulación con genéricos postizos a partir del siglo XX. Publicau en Onomàstica. Anuari de la Societat d Onomàstica, nº 2, 2016, pp 35-90.
  6. ↑ (es) Alejando Pérez, José Luis Simón, Manuel J. Vivó: Paisajes naturales de la región del Maestrazgo y Guadalope. Instituto de Estudios Turolenses, Mancomunidad turística del Maestrazgo, Teruel, 1983. pp 76-77.

Bibliografía

Se veiga tamién

Strategi Solo vs Squad di Free Fire: Cara Menang Mudah!