O río d'a Nata (a suya etimolochía ye incierta) ye un río d'a comarca de Sobrarbe, afluent d'o río Cinca por a man ezquierda, que naixe d'a baixant meridional d'a Sierra Ferrera a poca distancia d'a localidat de Sant Chuan, en a part norte d'a subcomarca natural que ye a Fueva, y circula en sentido sud-sudueste bels 20 km recullendo l'augua de bels atros barrancos y torrents que dimanan d'a mesma sierra, dica que desaugua en l'entibo de Mediano a poquez metros por debaixo d'o nuclio de Cherbe. O nombre popular conoix tamién una forma en plural, «as Natas», que s'emplega mas que mas ta referir-se a lo congosto por a on que iste río esnaviesa en o suyo zaguer tramo.
O vivero d'a Nata se puede trobar en l'endreto que se conoix como Espluga Escala, por una espluga habitable que se troba en a baixant sud d'a Sierra Ferrera, por debaixo d'o Collau d'o Ueso Santo. Iste espacio ye accesible a piet dende Sant Chuan y yera lo camín tradicional que s'emplegaba en as localidaz que fizon parte d'o municipio de Toledo d'a Nata (que saca lo nombre d'o río), d'entre Sant Veturián y a partida de a Foradada d'o Toscar, ta pasar cara ta la valle d'a Espunya, en a que teneban acuerdo ta tirar madera.
En l'actualidat, por mor de a existencia de l'entibo de Mediano, a desembocadura d'a Nata en a Cinca se troba muitos metros ta lalto d'a on que enantes se trobaba. En os anyos que o nivel de l'entibo ye alto, a desembocadura ye chusto debaixo de Cherbe, a 8 u 10 metros d'altaria sobre o nivel d'a mar por debaixo d'a localidat que ye o nivel mas altero que adube l'entibo, mientres que d'antigos o río esnavesaba en pasando de largo y desembocaba en a Cinca a ribera de Mediano.
Se veiga tamién
Vinclos externos
