Puntos de fusión (en azul) y puntos d'ebullición (en rosa) d'os ueito primers acidos carboxilicos (°C).
O punto d'ebullición ye a temperatura a la que una substancia, pasa d'o estauliquido a o estau gas, u d'o revés. Tamién se diz punto de condensación.
A temperatura d'una substancia u d'un cuerpo ye una mesura d'a enerchía cinetica d'as suyas moleculas. A temperaturas inferiors a o punto d'ebullición, nomás una chicota fracción d'as moleculas d'a superficie, tienen prou enerchía ta crebar a tensión superficial y eslampar.
En plegar ta o punto d'ebullición, a mayoría d'as moleculas son capables de fuyir dende cualsiquier parti d'o cuerpo (no nomás dende a superficie). Manimenos, ta a creyación de bombollas en tot o volumen d'o liquido, s'amenistan imperfeccions u movimientos, precisament a causa d'o fenomeno d'a tensión superficial. Un liquido puet escalfar-se por dencima d'o suyo punto d'ebullición. En iste caso parlamos de sobreescalfamiento. En un liquido sobreescalfato, una chicota perturbación, prevocará una ebullición de pronto (y talment explosiva) d'o liquido. Iste fenomeno se puet observar en fer calentar l'augua en un recipient liso (por eixemplo de pyrex) en un microondas. En adhibir un solido (por eixemplo zucre) en ista augua sobreescalfata, tot o contenito puet prencipiar a bullir de traza explosiva, causando crematas a las personas que se troben amán.
O punto d'ebullición, pende muito d'a presión, a diferencia d'o punto de fusión que lo fa muito menos. Ista diferencia permite a intersección d'as curvas d'equilibrio de fusión y ebullición en o diagrama Presión - Temperatura, en o dito punto triple, una presión y temperatura a on coexisten en equilibrio as tres fases: solida, liquida y gaseosa.
