Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.
Un pozo.
Un pozo u puzo (d'o latín <PUTĒU)[1] ye un forato en tierra, de profundidat variable, con o cual s'adube o conteniu d'una capa freatica inferior a la d'o suelo. Bi n'ha naturals y atros que son u han estau excavaus por l'hombre. De regular, predominan os que tienen prochección vertical.
En os pozos excavaus por a mano de l'hombre, a misión gosa estar a d'extrayer cualque cosa que se trobás en una capa inferior de a tierra. Tipica, y posiblement a mas antiga d'as finalidaz, heba estau a extracción d'augua, especialment en puestos a on que iste estás un elemento escaso en o environe. Tamién se'n ha feito con utilidat menera, ta baixar os treballadors baixo tierra, u ta quitar recursos cheolochicos liquidos, como o petrolio.
Toponimia
A parola pozo/puzo se troba como formador de toponimos y microtoponimos por a importancia d'os pozos como puntos pa furnir d'augua a personas y animals. A variant puzo se troba muito a sobén en a microtoponimia de cualques zonas de l'Alto Aragón a on actualment se siente pozo en a parla viva. Por eixemplo en a valle de Tella se diz pozo pero bi ha un Plan de Puzo como microtoponimo[2]. Atros autors han sinyalau situacions pareixidas en atras zonas de l'Alto Aragón, por eixemplo en a Val de Benás se diz pozo (pronunciau con seseyo /poso/[3]), pero se troba puzo (/puso/) en a microtoponimia[4], coexistindo con o celebre Pocez (/Posets/). Microtoponimos con a variant puzo se troban tan a lo Sud como Lobarre (fuente del Puzo[5]), Salas Baixas (El Puzo[5]), La Poblla de Fantova (Coma el Puzo[6]), Güell (El Puzo[6]), y mesmo en a localidat ribagorzana catalanoparlant d'Arén de Noguera (Lo Pusso[7]).
