Mount Cook Village (en maorí Aoraki, oficialment Aoraki / Mount Cook) ye una localidat situada en a rechión de Canterbury en a Isla d'o Sud de Nueva Zelanda. Se troba aintro d'o Parque Nacional d'o Mont Cook en l'extremo d'a carretera estatal 80, a nomás 15 km[1] a o sud d'a tuca d'o pico mas altero d'o país, o mont Cook.
Por estar situau aintro d'un parque nacional, no ye posible adquirir una propiedat en Mount Cook Village, manimenos, debiu a la existencia de bels hotels y motels, o lugar tien una chicota población permanent d'alto u baixo 250 personas.[2] Toz os edificios y instalacions operan con concesions d'o gubierno. O lugar no tien supermercaus fueras d'una chicota botiga con productos de primera necesidat en un hotel. O supermercau mas amán se troba a 65 km de distancia en Twizel, a localidat mas amanada. Bi ha una benzinera d'autoservicio dezaga d'as instalacions hoteleras, encara que o pre d'a benzina amuestra o isolau que ye o lugar.
En Mount Cook Village bi ha una chicota escuela con menos de doce ninos, a sola escuela de Nueva Zelanda aintro d'un parque nacional.[3]
Turismo
Mount Cook Village aculle a alto u baixo 250.000 visitants cada anyo[2] con una gran variedat d'instalacions y aloixamientos.
Un hotel d'estilo internacional, The Hermitage[4] en referencia a o nombre de l'hotel orichinal construyiu en 1884, ye l'unico gran edificio d'o lugar y un destín popular, mas que mas ta os turistas internacionals. The Hermitage ye a sobén emplegau tamién como nombre alternativo ta a propia localidat. L'hotel ye tamién propietario y expleita bel chalet y chicoz motels como opcions ta atra mena de viachers como mochilers u familias.
Bi ha tamién atros dos motels mas en o lugar y un total de cuatre restaurants u pubs, dos d'os cuals son aintro d'o propio complexo hotelero. Os diferents edificios de l'hotel y os motels son connectaus por camins asfaltaus.
D'atra man se puet trobar tamién o White Horse Hill, un camping situau a 2 km difuera d'a localidat y connectau a ista por un camín d'acceso piatonal.
Entre atras actividaz s'ofreixen vesitas guidadas por o parque, safaris en 4x4, recorrius en barca por o laco glaciar Tasman, cursas en caballo, pesca y vuelos escenicos incluyindo l'aterrizache en cheleras. Todas ellas tienen como base, salen y plegan a la dentrada prencipal de l'hotel.
Se pueden fer un gran numero d'excursions y escaladas por a zona, dende gambadas de 10 menutos dica rotas de cuantos días que permiten explorar a zona dende Mount Cook Village.
Bi ha tres rotas curtas de senderismo a traviés de zonas forestals en a propia localidaz y a suya redolada, asinas como puntos d'inicio d'atras rotas mas luengas que van dende a popular y fácil Hooker Valley Track dica atras muito mas dificils como a que leva enta os ibons de Sealy.[5]
O lugar ye seu d'o centro de vesitants d'o parque nacional,[6] y punto de salida ta escaladors, cazataires u senderistas[7] que vienen a ista zona.[8]
Historia
O primer edificio en o puesto a on se troba actualment Mount Cook Village estió o segundo hotel Hermitage, contruyiu en 1913 y enguerau en 1914, encara que iste se cremó totalment en 1957 y fue reemplazau en 1958 por o que sería l'actual hotel.
As decadas de 1960 y 1970 veyoron un gran creiximiento de l'hotel y o propio Mount Cook Village, incluyindo a construccions de tuberías, tractamiento d'auguas repuyals, construcción de carreras y d'accesos dende a carretera estatal 80. S'establió una brigada local de bomberos en 1976.[2]
O nombre oficial d'o lugar s'incluyó como Aoraki / Mount Cook en a lista oficial de toponimos bilingües de Nueva Zelanda gracias a os alcuerdos de 1998 con os Ngāi Tahu.[9]
Referencias
Vinclos externos
