O monesterio de Sant Martín Cercito yera un monesterio medieval situato en o lugar de Cercito, hue despoblato, en a val d'Acumuer.
O monesterio tenió importancia en l'antigo reino d'Aragón u gubernó tota la val de l'Aurín entre o sieglo IX y o sieglo XV. Probablement dende o sieglo XIII o monesterio se tresladó ta la villa d'Acumuer, anque no se sape prou bien o lugar a on que se situaba. Sindembargo, seguntes José Luis Corral Lafuente, o monesterio s'establió en o sieglo X.[1]
En o suyo archivo documental, que encara s'ha puesto alzar, apareixen lugars d'a val como Larrés, Acumuer, Orzandué u Borrés. Apareixe tamién o monesterio en o cartulario de Sant Chuan d'a Penya debito a una donación que se fa un 5 de chulio d'entre 860 y 867.[2]
En o dito archivo de Sant Chuan d'a Penya se reconta a suya fundación. Seguntes diz a leyenda o conte Galindo II yera de cazata con os suyos caballers, cuan yeran encorrendo a un chabalín, troboron entre a vechetación una chicota ilesia con una lapida que deciba: "Ista ye a casa de Santa Columba y de Sant Martín y de Sant Chuan y de Sant Pietro". En veyer-la o conte decidió construyir en o puesto un monesterio ta que podesen vivir monches que servisen a Dios de día y de nueiz.
En o mesmo archivo de Sant Chuan d'a Penya tamién apareixe documentata a donación d'o rei Remiro I d'o monesterio de Sant Martín a o monesterio de Sant Chuan d'a Penya, chunto con os lugars d'Acumuer, Agurrín y Sant Vicent d'Arrés.
Referencias
Vinclos externos
