- Iste articlo ye sobre un actor espanyol; ta atros usos, se veiga Jesús Guzmán (desambigación).
Jesús Guzmán Gareta, naixiu de Madrit (Espanya) o 15 de chunio de 1926 y muerto en ixa mesma ciudat o 16 d'octubre de 2023,[1] estió un actor y escritor espanyol, activo en o mundo d'o teatro y d'o cine espanyol dende meyaus d'os anyos 1930 dica la suya muerte con 97 anyos d'edat. Actor prolifico, encara que siempre en papels segundarios, destacó tamién por os suyos treballos en series de televisión, en destacando a suya interpretación d'un cartero rural en a serie Crónicas de un pueblo a principios d'os anyos 1970. Perteneixeba a una familia d'actors, en estar fillo d'os actors Rafael Guzmán y Aurora Gareta y nieto y bisnieto d'actors.
Entre a suya ampla filmografía, se pueden mencionar as suyas interpretacions en cintas como Manolo, guardia urbano (1956, Rafael J. Salvia), Tres de la Cruz Roja (1961, Fernando Palacios), Atraco a las tres (1962, José María Forqué), La gran familia (1962, Fernando Palacios), Marisol rumbo a Río (1963, Fernando Palacios), Más bonita que ninguna (1965, Luis César Amadori), Per qualche dollaro in più (1965, Sergio Leone), Il buono, il brutto, il cattivo (1966, Sergio Leone), Sor Citroën (1967, Pedro Lazaga), El turismo es un gran invento (1968, Pedro Lazaga), ¡Se armó el belén! (1970, José Luis Sáenz de Heredia), Don Erre que erre (1970, José Luis Sáenz de Heredia) u El gran Vázquez (2010, Óscar Aibar).
Primeras anyadas
Jesús Guzmán yera naixiu en una familia d'actors teatrals que prencipió con o suyo bisavuelo Antonio Guzmán y continó con sus avuelos y sus pais, os actors Rafael Guzmán y Aurora Gareta. Encara que naixiu de Madrit, s'educó de nino en Barcelona, a on sus pais teneban una companyía teatral con a que fació lo suyo enguero en o mundo teatral en l'anyo 1935, continando la suya carrera interpretativa en atras companyías teatrals en interpretando chicoz papels.
Desembolique d'a suya carrera
Bien luego, en os anyos 1950, fació una chira por America en consolidando la suya carrera actoral, casando-se con l'actriz Elena Graci (Elena García Gil, tamién filla d'actors) o 20 d'aviento de 1951 en a Basilica de Nuestra Sinyora d'o Pilar de Zaragoza, y en l'anyo 1956 fació la suya primer cinta, Manolo, guardia urbano, dirichida por Rafael J. Salvia, a on treballó con actors como Manolo Morán, Tony Leblanc, Ángel de Andrés, Antonio Riquelme, Luz Márquez u Julia Caba Alba, desembolicando dende alavez la suya carrera como actor mas que mas en cine de comedia, encara que tamién treballó en cuantos spaghetti western rodaus en Espanya (en destacan Per qualche dollaro in più en 1965 y Il buono, il brutto, il cattivo en 1966, toz dos dirichius por Sergio Leone).
Sindembargo, la suya popularidat plegó en os anyos 1970 con a suya interpretación de Braulio, un cartero rural, en a serie de televisión Crónicas de un pueblo emitida por Televisión Española, encara que treballó en cuantas atras series de televisión y continó con a suya carrera teatral, en fundando la suya propia companyía teatral.
| Anyo
|
Títol d'a cinta
|
Papel
|
Director
|
Reparto
|
Atros
|
| 1956
|
'[3]
|
'
|
|
|
|
Referencias
Se veiga tamién
Vinclos externos
