A Institución Ferrando lo Católico (IFC) (Institución «Fernando el Católico» oficialment, en castellano) ye una entidat cultural pendient en a Deputación Provincial de Zaragoza y adscrita a lo Consello Superior d'Investigacions Cientificas (CSIC) a traviés d'a Confederación Española de Centros de Estudios Locales. Fue creyada en 1943 ta promover l'alta cultura aragonesa y ha experimentau diversas modificacions en as suyas ordinacions. A zaguer reforma, publicada en o Boletín Oficial d'a Provincia de Zaragoza en 2006, la define como Organismo Autonomo d'a Deputación Provincial de Zaragoza.
Fins
A IFC tiene como obchectivos o estudio y promoción d'a cultura y a ciencia aragonesas, a defensión d'o patrimonio cultural aragonés y a difusión en Aragón d'o conoiximiento universal. Ta aconseguir istas fins, a Institución se sirve d'as suyas actividaz d'edición, de formación y de divulgación cultural en cheneral.
Organización
A IFC ye un organismo publico y una entidat cultural, o que se reflecta en a suya organización. O Consello Rector, integrau por representants institucionals, ye l'organo de gubierno d'a Institución. Organos academicos son o Consello Academico y as suyas quinze Catedras.[1]
A chestión diaria d'a IFC pende en un retor, que han ocupau os profesors Fernando Solano, Ángel Canellas, Ildefonso-Manuel Gil, Guillermo Fatás Cabeza y Gonzalo M. Borrás Gualis. Dende lo 1 de chinero de 2007 o retor d'a IFC ye o profesor Carlos Forcadell Álvarez.
A IFC disposa de personal administrativo y tecnico ta desembolicar a suya labor.
Actividat
A Institución Fernando el Católico ye posiblement a primer editorial cientifica en Aragón. Publica unos setanta títols a l'anyo, que s'encuadran en coleccions como Actas, De Letras, Estudios, Fuentes Historicas Aragonesas, Historiadores de Aragón u Historia global.
Entre as suyas publicacions periodicas de carácter cientifico, se troba l'Archivo de Filología Aragonesa, que fue dirichida por o profesor Manuel Alvar ; a revista Caesaraugusta d'arqueolochía, concebida por Antonio Beltrán fa mas de meyo sieglo, u a Revista de Derecho Civil Aragonés que endreza Jesús Delgado Echeverría.
A Institución ofreixe libros electronicos d'acceso libre y gratuito en a suya pachina web, dentro d'a Biblioteca virtual IFC, que guarencian una ampla divulgación d'as publicacions cientificas. As condicions d'uso d'istas publicacions son especificadas en a propia pachina.
As catedras d'a Institución organizan cursos, conferencias, coloquios, conciertos y congresos cientificos.
Ta acomplir con os suyos obchectivos, a IFC tamién atorga premios, becas y aduyas a la rechira.
Centros asociaus
A partir de 1954, a IFC promovió a creyación de Centros d'Estudios Comarcals, como filials suyas en rechimen d'autonomía y en estreita cooperación con os Concellos y as entidaz culturals d'as comarcas. Denominaus huei Centros d'Estudios Locals Asociaus, son o Centro de Estudios Bilbilitanos, o Centro de Estudios Comarcales del Bajo Aragón-Caspe –antes clamau Grupo Cultural Caspolino–, o Centro de Estudios de las Cinco Villas, o Centro de Estudios Turiasonenses, o Centro de Estudios Borjanos y o Centro de Estudios Darocenses.
Biblioteca
A larga relación d'intercambio de publicacions cientificas ha dotau a la IFC d'una nutrida biblioteca, con fondos disposables ta o publico en a Biblioteca Ildefonso Manuel Gil d'a Deputación Provincial de Zaragoza.
Iste intercambio ha posibilitado, a mas, que as obras editadas por a IFC se troben en as prencipals bibliotecas y entidaz culturals d'o mundo.
Colaboradors destacaus
Con a IFC han colaborau representants de distintas dembas d'o saber. En l'actualidat, destacan os retors d'as distintas cadieras, como son Miguel Beltrán Lloris, María del Carmen Lacarra Ducay, Aurora Egido Martínez, José-Carlos Mainer Baqué, Severino Escolano Utrilla, José María Enguita Utrilla, María Antonia Martín Zorraquino, Jesús Delgado Echeverría, Luis Prensa Villegas, Fernando Mercadal Mairal, José Laborda Yneva, Jesús Colás Tenas, Guillermo Fatás Cabeza, Esteban Sarasa Sánchez y o recientment feneixiu Guillermo Redondo Veintemillas.
En o pasau, colabororon personaches como José Manuel Blecua, Fernando Lázaro Carreter, Antonio Serrano Montalvo, José Galiay Sarañana, Luis Forno Liria, Guillermo Fatás Ojuel u Emilio Larrodera, entre otros.
Se veiga tamién
Vinclos externos
