A ilesia de l'Asumpción de Ligüerre d'Ara ye una ilesia d'estilo barroco perteneixient a la diocesi de Balbastro-Monzón y l'arcipestrau de Sobrarbe-Ribagorza y situada en o lugar de Ligüerre d'Ara, en o municipio de Fiscal, en a comarca de Sobrarbe, en a provincia de Uesca (Aragón). Ye adedicada a l'Asumpción de Santa María.
Historia
Se construyió en o sieglo XVII en estilo barroco. Entre os anyos 1936-1939, mientres a Guerra Civil Espanyola fue danyada y tanto o suyo retablo como o coro y atro mobiliario fue destruyiu. O conchunto fue esviellau en o zaguer cuarto d'o sieglo XX.
Se menciona como ilesia parroquial d'o lugar en o decimo volumen d'o Diccionario geográfico-estadístico-histórico de España y sus posesiones de Ultramar de Pascual Madoz, a on apareixe descrita con as siguients palabras:
«igl, parr. (la Asuncion), que comprende el anejo de San Justo, cuya vicaria perpetua se provee por el diocesano ó S. M.; teniendo el cementerio delante de la puerta con direccion al E. y fuera del pueblo».
Descripción
Ye situada en o estremo norte d'o lugar entre as viviendas y a zona a on son as bordas. En o suyo costau sud tien un edificio adosau que habió d'estar l'antiga abadía.
Se tracta d'una nau rectangular feita de mampostería escallada y dividida en cuatre trampos, con cabecera recta y mas estreita que s'orienta enta l'ueste. I hai dos capiellas en cada costau. Os diferents trampos d'a nau se cubren con vuelta de lunetos dividida tamién en cuantos tramos que se troban deseparaus por faixons que apean en alto y a bisel. A suya cabecera se cubre, igual que as cuatre capiellas, con vueltas de meyo canyón.
En o costau sud s'ubre a sagristía, formada por una cambra cubierta por vuelta d'ariesta y un paso cubierto por vuelta de meyo canyón. En o norte, chusto dencima d'a zaguera capiella se troba a torre, de tres cuerpos, que teneba d'antis mas acceso exterior, pero que agora se fa dende l'interior. Tien dos pisos voltaus con canyón transversal y zarraus con una cupula. I hai dos finestras pa as campanas orientadas enta l'este y una atra enta o sud.
L'acceso a la ilesia se fa por a puerta que se troba a los piez de l'edificio, a traviés d'un arco de meyo punto rebaixau, de grans dovelas y moldurau con tres meyas canyas. Debant d'a puerta i hai un portegau cuadrangular, que ye cubierto con una vuelta de meyo canyón y ubierto a l'exterior por embocadura de meyo punto. O suyo coro, situau en alto sobre a dentrada, se destruyió en l'anyo 1936. Se i puyaba dende o muro norte d'a nau.
En o suyo interior cal destacar a pila auguabenditera semiesferica que data de l'anyo 1777. I hai restas de pintura popular en a suya voveda.
Referencias
Vinclos externos
