A ilesia de Santa María d'o Pueyo de Tolva ye una ilesia aragonesa d'estilos romanico, barroco y neoclasico que se troba en a localidat de Tolva, en a comarca de Ribagorza y provincia de Uesca. A suya localización ye en o centro d'a localidat.[1]Dende lo punto d'anvista d'a suya adscripción administrativa en a Ilesia Catolica, pende de l'arcipestrau d'Sobrarbe-Ribagorza en a diocesi de Balbastro-Monzón y de l'archidiocesi de Xaragoza.
Ye una ilesia consagrada a santa María (en a suya advocación de Santa María d'o Puy)[2] construyida en o sieglo XII en estilo romanico, que ye la ilesia parroquial d'o lugar. Tanimientres, a ilesia tenió cuantos esviellamientos posteriors en estilos barroco y neoclasico, con fundas modificacions sobre lo templo principal. De feito, la part prencipal de l'edificio que hue podemos veyer ye d'o sieglo XVI.[2]
Cal destacar que la suya frontera occidental no ye la orichinal d'o templo y ye procedent d'a ilesia d'o castiello de Falces de Tolva (a ilesia d'os Santos Chusto y Pastor de Falces), habendo-se feito lo suyo treslau a finals d'o sieglo XIX.[2][3] con motivo d'o deplorable estau d'a ilesia en cuestión.[4]
Historia
O primer templo romanico fue consagrau por l'occitán Pero de Roda, bispe de l'archidiocesi de Pamplona.[4]
Descripción
En l'edificio destaca mas que mas a suya frontera occidental, procedent d'a espaldada ilesia d'os Santos Chusto y Pastor de Falces,[2] como s'ha indicau anteriorment.
Frontera
A suya puerta de dentrada, en arco de meyo punto destaca sobre la frontera en sobresalir d'a mesma y poseye cinco arquivoltas sobre una impostaque a la suya vegada reposa sobre dos columnas con os suyos respectivos capitels,[4] ornamentaus con motivos animals[2] (lions). O saledizo ye rematau con un arrimadiello que descansa sobre tres canez. Dencima d0a puesta se troba un gran finestral.[4]
Planta
Ye un edificio con nomás que una sola nau dotau de capiellas laterals y con una cabecera poligonal.[2] la nau ye dividida en tres trampos y se troba cubierta por vuelta de crucería.[3] As capiellas laterals son as parts mas modernas d'o templo y se construyoron ya en estilo barroco.[3]
Nau
A sola nau d'a ilesia ye en forma rectangular, estando construyida la part inferior d'a mesma en piedra picada y en ladriello la part superior d'os suyos muros.[3]
Torre
A suya torre tien a peculiaridat de contar con un primer trampo en planta cuadrada y un segundo trampo en planta octagonal, poseyendo una finestra en arco de meyo punto.[2][3]
Referencias
- ↑ (es) Iglesia de Santa María del Puy en Arte Viajero.
- ↑ 2,0 2,1 2,2 2,3 2,4 2,5 2,6 (es) Iglesia de Santa María del Puy de Tolva en a web d'o Concello de Tolva.
- ↑ 3,0 3,1 3,2 3,3 3,4 (es) Iglesia de Santa María del Puy en a web d'o Sistema de Información del Patrimonio Cultural Aragonés.
- ↑ 4,0 4,1 4,2 4,3 (es) Jaime Cobreros Aguirre: Las rutas del románico en España. Volumen II: Aragón, Cataluña, Navarra, País Vasco y La Rioja, Grupo Anaya, S.A., Madrit, 2004, 1era edición, ISBN 84-9776-112-X, p.218-219.
Vinclos externos
