A ilesia de Sant Lamberto de Woluwe-Saint-Lambert (Église Saint-Lambert en francés y Sint-Lambertuskerk en neerlandés) ye una ilesia belga d'o sieglo XII (encara que restaurada y enamplada en l'anyo 1939) d'estilo romanico que se troba en a localidat de Woluwe-Saint-Lambert, en a rechión de Bruselas-Capital en Belchica. Dende lo punto d'a vista d'a suya adscripción administrativa en a Ilesia Catolica, pende d'o deganato de Bruselas Nord-Este en o vicariau de Bruselas en l'archidiocesi de Mechelen-Bruselas.
Orichen y historia
Saint-Lambert yera lo segundo d'os tres lugars (u parroquias) situaus a lo canto d'o río Woluwe. Dende lo sieglo XII lo lugar teneba la suya ilesia d'estilo romanico pareixida sin garra dandalo a un refuchio fortificau. A suya torre de forma cuadrada, solida y maciza, encara visible hue, en fa uebra. A suya nau lateral dreita (puet estar que l'antiga unica nau d'o templo) y la torre-campanar datan d'o sieglo XII. L'entrada lateral, baixo lo campanar (con una puerta con arco de meyo punto), ye orichinal d'ixas envueltas y se i troban bellas lapidas perteneixents a los sinyors de Woluwe[1] y datadas en o sieglo XVII.
Dende los suyos inicios dependeba d'a seu de Sant Miguel y Sant Gudula de Bruselas y la ilesia, a l'igual que la localidat mesma a on se troba, recibiban la influyencia creixent de l'amanada ciudat de Bruselas, con a cual cosa Woluwe-Saint-Lambert se convertió en una localidat suburbana de Bruselas. Asinas, o creiximiento d'a población en o suyo numero d'habitants implicaba la necesidat d'ampliación d'o templo, desenrollando-se asinas dos ampliacions mientres os sieglos XVIII y XIX. Finalment, a ilesia estió obchecto d'una restauración en l'anyo 1939 y recibió lo 27 d'abril de 1942 protección legal con a suya declaración como Patrimonio cultural en Belchica,[2] la figura legal belga equivalent a la de Bien d'Intrés Cultural.
Patrimonio
En a suya nau ezquierda se i conserva una chicota estatueta en fusta, obra d'o rei Alberto I cuan yera adolescent y que donó a la iglesia en 1940 su chirmana María Chusefina, moncha en o monesterio beneditín de Santa Lioba en Namur.
Referencias
Vinclos externos
.jpg)
