A ilesia de Sant Istevan de Botaya ye una ilesia aragonesa adedicada a Sant Istevan, situada en o lugar de Botaya, a 958 metros d'altaria sobre lo livel d'a mar,[1] en o termin municipal de Chaca, en a comarca de Chacetania en a provincia de Uesca. Dende o punto d'anvista eclesiastico, pende de l'arcipestrau de Chaca-Berdún en a diocesi de Chaca y archidiocesi de Pamplona y Tudela.
Ye una ilesia construyida en piedra picada en o sieglo XII en estilo romanico, encara que en o sieglo XVIII tenió una important transformación en a cual desaparixioron cuasi toz os suyos elementos romanicos, conservando-se nomás que l'antigo timpano encastau en a suya frontera actual, la suya pila baptismaly parte d'uno d'os suyos muros, lo muro norte.
Descripción
A ilesia de Sant Istevan de Botaya poseye nomás que una sola nau de forma rectangular con vuelta de canyón con lunetas. Tiene capiellas laterals y presbiterio con cobertura por cupula.[2]
A nau remata en un abside de forma semicircular.
O timpano romanico
O timpano ye tresladau dende la suya ubicación orichinal fácil que en a frontera prencipal y conservau como elemento decorativo dimpués d'estar esviellau lo templo en o sieglo XVIII. Amuestra a Chesús de Nazaret como Cristo en machestat u Pantocrátor en mandorla acompanyau d'os doce apóstols, seis a cadaguno d'os suyos cantos. A suya simbolochía se centra en o numero 6, estando 6 los apóstols de cada canto, 6 os brazos d'o crismón, etc.[3]
As suyas trazas amanan iste timpano a los treballos d'o clamau mayestro de Sant Chuan d'a Penya u mayestro d'Agüero.[3]
A pila baptismal
Se conserva la pila baptismal d'estilo romanico, tallada en un bloque de piedra.
Arte mueble
La ilesia conserva bels retaulos en estilo barroco, entre los cuals destaca un adedicau a Sant Hadrián procedent d'a ermita homonima.[2]
Vinclos externos
Referencias
- ↑ (es) Botaya. Parroquial de San Esteban en www.romanicoaragones.com.
- ↑ 2,0 2,1 (es) Botaya, en a web d'a comarca d'a Chacetania.
- ↑ 3,0 3,1 (es) Jaime Cobreros Aguirre: Las rutas del románico en España. Volumen II: Aragón, Cataluña, Navarra, País Vasco y La Rioja, Grupo Anaya, S.A., Madrit, 2004, 1era edición, ISBN 84-9776-112-X, p.172-173.
