Se tracta d'una iglesia d'una sola nau de cuatre trampos deseparaus entre éls por arcos de meyo punto con vueltas de meyo canyón con lunetos y un abside poligonal en cadagún d'os suyos extremos. Ista planta ye l'unico que queda d'a primitiva ilesia, construita en estilo mudéchar en o sieglo XIV, ya que dimpués se modificó, devantando de nuevo a ilesia con as suyas dos torres a os dos cantos d'a frontera.
En os laterals s'ubren bellas capiellas entre os contrafuertes, una por cada trampo, deseparadas por arcos de meyo punto, entre os que i hai pilastras corintias. As capiellas se cubren con vueltas de meyo canyón, fueras d'as dos mas amanadas a la cabecera, cubiertas con vueltas d'ariesta debiu a la suya mayor grandaria.
A frontera d'a ilesia data d'a epoca barroca, cuan se transforman as capiellas laterals y se i adhiben as dos torres chemelas de planta cuadrada, con cuatre cuerpos degradaus suaument y decoraus con pilastras d'ordens toscano, corintio y compuesto. Os chapistels d'istas rematan en forma de piramide. A portalada de dentrada s'ubre a traviés d'un arco rebaixau, coronau por un frontón curvo y capilleta.
O ladriello ye l'unico material de construcción, difueras d'o basamento de piedra que sustenta a las torres. A resta d'o templo carece de decoración exterior, estando formau nomás por cerenyos muros ciegos de ladriello.
