A ilesia de Nuestra Sinyora d'Altabás ye una ilesia d'estilo neoclasico construyída en as anyadas 1890-1892 que se troba en Zaragoza (Comarca Central, Aragón), en o districto d'o Rabal.[1].
Ye a seu d'a Cofradía del Santísimo Ecce-Homo y de Nuestra Señora de las Angustias.
Historia
Ista ilesia, construyida por Fernando de Yarza entre os anyos 1890 y 1892, sobre un proyecto anterior de 1858[2] de José de Yarza, vino a substituyir a una anterior ilesia de Nuestra Sinyora d'Altabás que se trobaba mas amanada a o puent de Piedra y que fue destruyida mientres os setios de Zaragoza.[3]
Descripción
Conta con una sobria frontera con dos chicotas torres en os laterals y o cuerpo central ye rematau por un frontón triangular. A puerta d'acceso ye adintelada y dencima, centrau, i hai un luneto semicircular de meyo punto. En a frontera no i hai garra decoración y nomás queda crebada por dos cornisas que marcan os cuerpos d'a frontera.
En l'interior a distribución ye de planta basilical de tres naus, estando a central mas devantada que as laterals y cubierta por vuelta de lunetos. Lo mas destacable en o suyo interior ye o Cristo de Fontarrabia y una talla de Sant Gregorio Magno,[4] patrón d'o Rabal, estando a resta d'as tallas d'o sieglo XIX.
Cristo de Fontarrabia
En 1638 en o marco d'a Guerra d'as Trenta Anyadas, tropas francesas a o mando d'o Prencipe de Condé setioron a ciudat de Fontarrabia y a o rescate acudioron tropas aragonesas a o mando d'o capitán Pablo Francés de Urritigoiti, Barón de Montevilla. En rematar a batalla, entre as enruenas se trobó a imachen d'un Santo Cristo horriblement mutilau. O capitán Pablo Francés de Urritigoiti lo pidió, le'n dioron y lo trayió ta Zaragoza. Mando restaurar-lo y lo metioron en una fachendosa capiella d'o convento de Sant Lazaro. Dimpués d'a desamortización, pasó a la ilesia d'Altabás. Tiene fama de miragloso dende antigo y fa parti d'a dita "Rota d'os tres Cristos", chunto a o d'o Pilar y a o d'a Seu.[5]
Catalogación
Ye inscrita en l'Inventario d'o Patrimonio Cultural Aragonés por lo que seguntes a lei 3/1999 de 10 de marzo d'o Patrimonio Cultural Aragonés tien a protección de Bien inventariau d'o patrimonio cultural aragonés.
Se veiga tamién
Referencias
Vinclos externos
