O dreito (d'o latín< DERECTUS)[1] ye o conchunto de normas que richen a vida d'una sociedat, reglando o comportamiento d'os individuos y grupos que la conforman, y resolvendo os conflictos que se producen entre ellos. Ista definición sirve ta o dreito positivo, pero atras definicions alternativas tamién han estau proposadas por churistas, filosofos y teoricos d'o dreito, sin que bi haiga un consenso. A Filosofía d'o Dreito estudia o concepto de Dreito.
Orichen
O naiximiento d'o Dreito no ye esclatero. Os autors se trestallan en dos opinions:
O Dreito naixe como reparación a una afrenta fisica u moral que una persona fa a otra.
O Dreito naixe ta reglar a indemnización debida por a no observanza d'una palabra dada, en cheneral, ta reglar os negocios entre as personas.
Historicament, o naiximiento d'a norma churidica se preduz como imposición de qui exerce o poder. Iste concepto se suavice posteriorment, dica plegar a sistemas como l'occidental vichent, en que as leis brotan d'o pueblo a traviés d'a esleción que iste fa d'o poder lechislativo.
O Dreito se trestalla tradicionalment en as categorías de Dreito publico y Dreito privau u civil. Manimenos, ista troxadura ha estau amplament creticada y enguán no en tien tanta de fuerza, debant d'a aparición d'atros campos de l'Ordenamiento Churidico en as que as diferencias entre o publico y o privau no son tan evidents (p. ex, o Dreito laboral, en o que a relación privada entre o treballador y lo empresario se troba intervenida por una normativa publica.
Contino se enumeran as prencipals brancas churidicas:
