A Ciudat libre de Cracovia u Republica de Cracovia (en polaco y oficialment Wolne, Niepodległe i Ściśle Neutralne Miasto Kraków z Okręgiem, Ciudat libre, independient y estrictament neutral de Cracovia y d'a suya redolada en aragonés) estió un antigo estau, hue despareixiu, que naixió con o Congreso de Viena o 3 de mayo de 1815 como una traza de protectorau conchunto de l'Imperio Austriaco, o Reino de Prusia y l'Imperio Ruso sobre a localidat de Cracovia. A suya existencia ye marcada por dos escaicimientos prencipals, a dita Sublevación de noviembre (29 de noviembre de 1830) y a dita Sublevación de Cracovia (16 de noviembre de 1846), rematando ista zaguera con a fin d'a independencia de Cracovia, anexionada a l'Imperio Austriaco (como Gran Ducau de Cracovia).
En estar a luenga oficial d'a Ciudat libre de Cracovia o polaco y en recebir a cuantos estudiants de toz os territorios de luenga polaca baixo control d'o Reino de Prusia, de l'Imperio Ruso y de l'Imperio Austriaco ta estudiar en a Universidat Jaguellonica, Cracovia se convertió en o centro cultural u mesmo politico de Polonia mientras a suya existencia como estau, en haber desapareixiu l'antigo estau polaco con as Particions de Polonia a finals d'o sieglo XVIII.
