Os chodigos, encara que en radito numero, puede que haigan viviu en Magallón dende a epoca romana. Manimenos en a baixa Edat Meya los reis cristianos favoreixioron o suyo asentamiento. Asinas en o sieglo XV a comunidat chodiga constituyiba un 10% d'a población magallonera y pagaba una peita de con 200 sueldos anyals a lo rei.
Bi ha una sentencia arbitral de l'anyo 1415 entre os churaus y os adelantaus Alçach Gallach y Abraham Muniech en representación respectivament d'o concello y l'alchama que describe as mugas d'a chudería seguntes un informe comendau a l'alcaide Miguel Vallori por a reina Violant:
[...] se les da et assigna por judaria et limites de aquella do esten et habiten daquia adalant [...] la carrera que va a suso enta la iglesia de Sant Miguel, et dalli a iuso enta el muro, et del muro a suso enta la puerta de Puent Nevado
A sinoga, edificio d'una sola nau y teito a doble versant que teneba anexo un hespital, fue reparada en l'anyo 1434. Bi heba tamién en l'alchama un banyo publico. O suyo centro politico y relichioso s'ubicaba probablement en l'actual carrera Cabezo.
En 1492 se decretó la expulsión de toz os chodigos y estioron mandaus a l'exilio enta Tudela u embarcaus en Tortosa. Asinas, familias con apellius como los Majo, os Atortox, os Caruch, os Arueti, os Levi u los Belmoder habioron de vender as suyas posesions a los cristianos y abandonar os suyos fogars.
O 11 de chulio de 1492 a sinoga estió vendida per l'alchama a Miguel Coll, escudero, per 650 sueldos.[2] Encara en 1493 beluns d'os chodigos que heban optau por o suyo exilio en Navarra obtenioron un salvoconducto pa baixar por l'Ebro dende Mallén dica a Mediterrania.
Referencias
↑’’La villa de Magallón, siglos XII-XX’’, Institución “Fernando el Catolico”, 2017, p. 85
↑Revista Turiaso V, Centro de Estudios Turiasonenses, 1984, p.116
Bibliografía
(es)Guía de las juderías de Aragón. Un apasionante recorrido por el Aragón judío. Miguel Ángel Motis Dolader. Guías Turísticas Prames. ISBN 978-84-8321-357-5
