Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.
Mapa hipotetico sobre lo territorio de los bascons y los suyos vecins
Los bascons[1] (en latínVascones) estioron un pueblo prerromano habitador de Navarra y zonas mugants que incluyiban actuals territorios de lo norueste d'Aragón. Mientres lo periodo de la Hispania romana y Reino Visigodo de Toledo seguiban mencionando a los habitants d'ixas zonas como "bascons", etnonimo que seguntes bel autor remató aplicando-se a totas las poblacions no romanizadas de los Pireneus y alta val d'Ebro u los habitadors d'ixas rechions. Lo etnonimo de los bascons orichinó la denominación de "gascons" pa los habitants de l'antiga Novempopulania, y talment se relacione con lo etnonimo de los actuals "bascos".
La interpretación sobre lo concepto de bascons y lo territorio que habitaban u controlaban ye subchecto a polemica a causa de los diferents transfondos ideolochicos contraposaus de los historiadors y archeologos.
Primeras mencions a los bascons
Retrato de Tito Livio, a qui se debe la primera mención historiografica que se conserva de l'antigüidat sobre los bascons
La descripción de lo territorio que los bascons[2] ocupaban mientres la epoca antiga mos ha plegau a traviés de los textos de los autors clasicos, entre lo sieglo I aC y lo sieglo II, Tito Livio, Estrabón, Plinio y Claudio Ptolomeu que han estau los estudiaus en mes mesura[3] como fuents de referencia, encara que bels autors han senyalau la manca d'uniformidat y mesmo contradicción d'as suyas informacions u advertiu sobre la interpretación realizada, en particular pa con las heredadas d'Estrabón.[4]
La mención historiografica mes antiga[5] corresponde a Livio (59 a. C. - 17) qui, en un breu pasache de lo fragmento XCI de la suya obra sobre la campanya de l'anyo 76 a. C. de la guerra sertoriana, relata como dimpués de remontar lo río Ebro y la civitas de Calagurris Nasica, se trescurza lo territorio plan de los bascons u Vasconum agrum dica las mugas d'os suyos vecins, los berons.[6] D'un estudio comparau d'atras parz de lo mesmo fragmento, se deduz que ixa muga se trobaba a l'ueste, mientres que enta lo sud los bascons yeran vecins de la ciudat celtibera de Contrebia Leucade.[7]
Plinio en Naturalis Historia reprodució un texto anterior de l'anyo 50 a. C. en lo que se situaba a los bascons en los cabos occidentals de los Pireneus, vecins de los Vardulos, y estendillaus dica los monts d'Oiarso y la Mar Cantabrica en un aria que denominó Vasconum saltus.[8] Lo cheografo griego Estrabón, en ixas envueltas d'Augusto (63 a. C. - 14), cuan se referiba a los bascons (en griego clasico, Ούασκώνων) sitúa a suya principal pólis en la ciudat de Pompaelo[9] chunto tamién la ciudat de Callagurris.
"Las dos poblacions, con Kalágouris, una de las ciudaz de los ouáskones,... Esta mesma rechión ye trescurzada por la vía que sale de Tarrákon y va dica los ouáskones de la marguin de l'Oceano, ta Pompélon y ta Oiáson, ciudat alzada sobre lo mesmo Oceano. Esta calzada mide dos mil cuatrocientos stadios y remata en la muga entre Akitanía y Ibería. [...] Dimpués, por dencima de la Iakketanía, en dirección a lo Norte, ye la nación de los ouáskones, que tien por ciudat principal a Pompélon, como qui diz "la ciudad de Pompéios"." (Estrabón)[10]
Claudio Ptolomeu, seguntes un gravau alemán de lo siglo XVI, qui enumeró las principals ciudaz basconas.
Estos datos se troban en la obra de Ptolomeu, qui vivió mientres lo sieglo II en tiempos de l'Imperio Romano, Geographikè Úphégesis, en lo capítol 6, 66 de lo suyo libro II detalla lo nombre de 15 ciudaz a l'interior de lo territorio de los bascons, amés de la costera Oiasso:[11]Iturissa, Pompaelo, Bituris, Andelos, Nemanturissa, Curnonium, Iacca, Graccurris, Calagurris, Cascantum, Ercavica, Tarraga, Muscaria, Seguia y Alavona.
↑...dimissis eis ipse profectus per Vasconum agrum ducto exercitu in confinio Beronum posuit castra,... ("...dimpués de levar (Sertorio) su exercito a traviés de lo territorio de los bascons instaló o suyo campamento en una zona mugant con los berons,..."). Texto seguntes P. Jal, Tite-Live. Histoire Romaine XXXIII. Livre XLV et Fragments. París, 1990 (1979), pág. 214-218
↑Naturalis Historia, 4,110-111: Proxima ora citerioris est eiusdemque Tarraconensis situus a Pyrenaeo per oceanum Vasconum saltus, Oiarso, Vardulorum oppida, Morogi, Menosca, Vesperies, Amanum portus, ubi nunc Flauiobrica colonia 8. Ciuitatium VIIII regio Cantabrorum, flumen Sauga, portus Victoriae Iuliobricensium. ac eo loco fontes Hiberi XM passuum portus Blendium, Orgonomesci e Cantabri. portus eorum Vereasueca, regio Asturum, Noega oppidum, in poeninsula Paesici, et deinde conuentus Lucensis, a flumine Nauialbione Gibarci, Egiuarri cognomine Namarini, Iadoui, Arroni, Arrotrebae, pronunturium Celticum, amnes Florius Nelo. Celtici cognomine Neri et super Tamarici 9 quorum in paeninsula tres arae Sestianae [-182→183-] Augusto dicatae, Copori, oppidum Noeta...
↑Str. III, 4, 10:...Ύπέρκειται δε τής Ίακκητανιίας πρός άρκτον τό τών Ούασκώνων έθνος, έν ώ πόλις Πομπέλων, ώς άν Πομπηιόπολις. (...dimpués, por dencima de la Iacetania, en dirección a lo Norte, ye la nación de los bascons, que tien por ciudat principal a Pompelon, como qui diz "la ciudat de Pómpeios".). Texto seguntes F. Lasserre, Strabon, Géographie II. Livres III et IV. Les Belles Lettres. París 1966.
.svg){kind=small}
