As Pleyades, conoixidas popularment en aragonés como As Crabetas[1], As Crapetas u o Corralet d'as Crabetas, ye un cumulo ubierto d'estrelas en a constelación de Tauro que se troba relativament cerca, a uns 440 anyos luz.
Només de 6 a 10 estrelas pueden estar vistas per o simple uello, pero con o telescopio se'n i vei dica 3.000. As estrelas azuls y blancas luminosas son as mes visibles. Se creye que a suya edat no brinca d'os 100 millons d'anyos, y que les ne queda bels 250 millons mes per debant.
O feito que se veigan muito de nueiz l'ha dato a las Crabetas un puesto especial en diferents culturas, antigas y modernas. Ta los vikingos, yeran pirinas d'a diosa Freya. Os maorís en dicen Mataariki, y o suyo devantamiento eliaco sinyala lo prencipio de l'anyada nueva, arredol d'o mes de chunio. Os aboríchens australianos creyeban que yeran una muller a qui Kidili, l'hombre d'a Luna, cuasi heba violata. Tamién, como en muitas culturas, yeran siete chirmanas, clamatas as Makara. Diz que os nativos americanos midiban a suya percepción visual per o numero d'estrelas que podeban veyer-ie. Mesmo en l'antiga Europa, sobretot en cerclos griegos, as Crabetas yeran una preba de visión frecuent. En o Sobremont indicaban cuan heba d'encomenzar o viache transhumant.[2]
Cuan as crabetas salen a l'hora d'a cena, fuera pastores a tierra ajena
En Chapón las conoixen per Subaru, y la marca d'autos que porta iste nombre emplega las Pleyades como logotipo.
En a mitolochía griega, as Siete Chirmanas yeran identificatas con:
- Alciona.
- Asterope.
- Electra.
- Maya.
- Merope.
- Taigueta.
- Celeno.
Istos son es nombres que s'asinan huei a cadaguna d'as estrelas d'o cumulo, ya que a mitolochía conta que as siete chirmanas rematoron tornando-se estrelas. Yeran ninfas d'os monts, fillas d'Atlas y Pleyona y se suicidoron dimpués d'a muerte d'as suyas chirmanas, as Iades.
Referencias
- ↑ (es) Brian Mott Nuevo Diccionario Chistabino-Castellano: con información etimológica, Logos Verlag, 2015, ISBN 978-3832539467, p.69
- ↑ (es) Elena Pérez "El otoño del viejo guardián de Sobremonte". Heraldo de Aragón, domingo 8 de noviembre de 2009, suplemento
