Wilhelm Fürchtegott Niedermann

Dr Wilhelm Fürchtegott Nidermaa (* 11. Jänner 1841 z Züri; † 26. Jänner 1906 au döört) isch e Schwiizer Jurnalischt und Mundartdichter gsi.

Er isch dr Soon vom Balthasar und der Verena Nidermaa gsi. Ane 1875 het er d Elisabetha Johanna Christiane Böder ghürootet.

Dr Wilhelm Nidermaa – nid z verwächsle mit em Pfaarer Wilhelm Niedermann (1845–1906) vo Oberuzwil – het als Journalischt, Redakter und Mundartautor gschaffet. Er het so wie dr August Corrodi und dr Jakob Stutz bsunders schwiizerdütschi Theaterstuck gschribe, wo me dozmol bi de lokale Theaterverein gärn gspiilt het. Eini vo de bedüütende Zürcher Theatergruppe isch dr Dramatisch Veräin Züri gsi, wo em Nidermaa sini Stuck als Uuruffüerig uf d Büüni brocht het.

1885 isch e Samlig vom Nidermaa sine Theaterstuck usechoo. Dr Otto Sutermeister het über iin im Band Aus dem Kanton Zürich vo sym Wäärch Schwizer-Dütsch. Sammlung deutsch-schweizerischer Mundart-Literatur gschribe.

Wäärch

• Züritüütsch, e dramatisches Läbesbild i 3 Acte i der Zürcher Mundart, 1882
• Ferieversorgig

Literatur

• Christian Schmid: Wilhelm Fürchtegott Niedermann In: Historisches Lexikon vo dr Schwiiz.
• Turicum, 21, 1990, S. 56.
• Samuel Zurlinden: Hundert Jahre. Bilder aus der Geschichte der Stadt Zürich in der Zeit von 1814–1914. Züri 1915, S. 275.