D Terroraaschleeg vom 7. Juli 2005 z London si e Serii vo islamistische Attentaat uf Ziviliste z London gsi, wo sich wääred dr Hauptvercheerszit am Morge im öffentlige Noochvercheer vo dr Stadt abgschbilt hai. Es handlet sich um die schwerste islamistische Terroraaschleeg in dr Gschicht vo Groossbritannie.[1]
Am 7. Juli 2005 isch d Inneschtadt vo London vo vier Terroraaschleeg erschütteret worde. Drei vo de Schprengsätz sind i dr U-Bahn und eine imene Doppelstockbus vo de Hauptschtadt vo Grossbritannie zündt worde. Drbii si 56 Mensche (die vier Sälbstmordattentääter inklusiv) umchoo und über 700 si zum Däil schweer verletzt worde. E Hufe Lüt si bis zum Noomiddaag in de betroffene Züüg iigschlosse bliibe.
Drei vo de vier Terroriste si Brite mit pakistanischem Wurzle gsi und si us dr Regioon vo Leeds choo. Wo iiri Hüüser dursuecht worde si, het mä Sprängstoff gfunde. Es isch nid sicher öb si d Absicht gha häi, bi de Aaschleeg sälber umzchoo.
D Aaschleeg si in de britische Medie au mit dr Abchürzig 7/7 (seven-seven) bezäichnet worde, in Aaläänig an die islamistische Terroraaschleeg vom 11. Septämber 2001 in de USA, wo under 9/11 bekannt worde si.
