D Schlangesüüle, wo die siigriiche Grieche em Apollon gweit häi.
In dr Schlacht bi Plataiai (altgriech., latiinischPlataeae) in Böozie het e Bündnis vo Grieche die persischi Armee under em Fäldher Mardonios im Summer 479 v. d. Z. gschlaage. Zämme mit dr Vernichdig vo dr Flotte vom persische Groossköönig bi Salamis het dr Siig bi Plataiai s Ändi vo de persische Versüech, Griecheland z eroobere, bedütet.
D Schlacht
Über d Schlacht sälber wäiss mä nüt Gnaus. Es wird verzellt, ass d Grieche bim ene erste Aagriff vo de Boogeschütze aaghalte worde si, denn im ene zwäie Aagriff zu de persische Räije cho si. Sicher isch, dass dr Pausanias de Athener under em Aristides uf em lingge Flügel dr Befeel gee het, sich e chli gege hinde zruggzzie, dass die aber witer aagriffe häi und eso e Lugge in dr griechische Falanx entstande isch. Dr Mardonios het mit duusig Riiter därt aagriffe, isch aber vo de Spartiate under em Pausanias, aaghalte worde und gfalle. D Perser häi denn glaubt, ass d Schlacht verloore sig und häi afo flüchte.
D Folge
D Perser häi sich uf Asie zruggzooge, d Griechestedt an dr chläiasiatische Küste häi sich vo dr persische Oberherschaft freigmacht und si im Attische Seebund biidräte, wo Athen 477 v. d. Z. gründet het. Es isch denn e Zit choo, wo relativ friidlig gsi isch und wo as Blüetezit vom klassische Griecheland gältet. Zum dr Siig z fiire, häi vo denn aa alli fümf Joor d Freihäitsspiil (Eleuthéria) stattgfunde.
Litratuur
Peter Hunt: Helots at the Battle of Plataea, in: Historia 46 (1997), S. 129–144.
Peter Green: The greco-persian Wars. University Press, Berkeley, Calif. 2008, ISBN 0-520-20313-5, S. 239-287.
A. A. Evans, David Gibbson: Militärgeschichte vom Altertum bis heute. Bassermann, 2009, ISBN 978-3-8094-2549-6.
Dä Artikel basiert uff ere fräie Übersetzig vum Artikel „Schlacht_bei_Plataiai“ vu de dütsche Wikipedia. E Liste vu de Autore un Versione isch do z finde.
