Dr Nicolaus Episcopius, mit dütschem Name dr Niklaus Bischoff (1501-1564), isch ä Buechdrucker in dr Schdadt Basel gsi.
Läbe
Dr Niklaus Bischoff isch 1501 z Rittershofe im Elsass uf d Wält cho. Er isch z Mondidier en Bresse uf d Schuel und het dört ä Buechdruckerlehr gmacht. Im Früehligssemeschder vom Johr 1518 het er sich an dr Universidet z Basel iigschriibe und isch ä Fründ vom Hieronymus Froben worde. 1520 isch er Basler Bürger worde. Er isch zu dere Ziit mit em Hieronymus Froben nach Chur greist und beidi hai dr Magister Titel vom bäbschtlige Legat Antonio Pucci übercho. 1526 isch er noch Baris greist. Er het as Korräkter gschafft bim Johan Froben, wo 1527 gschdorben isch. Im Johr 1529 het er em Hieronymus Froben si siibzähjöhrigi Schwöschder, d Justina (1512–1564) ghürotet, isch ins Huus „Zum Sässel“ zooge, wo im Johann Froben ghört gha het, isch am 16. April in dr Safre Zumft ufgnoh worde und het agfange mit sim Schwoger zsämme Büecher uusege. Er isch vor allem für s Gschäftlige verantwortlig gsi, isch an d Schdroossburger Mäss gfahre und het sich überhaupt vil mit de Chunde im Elsass abgä. Z Friburg isch er au ä baar mol gsi, noch Dole isch er 1528 und and Mäss vo Lyon 1534 gfahre. Am 27. November 1537 isch siis Familiewappe vom Kaiser beschdädigt worde. 1542 het er em neue Ehegricht aghört und 1555 isch er in dr Leitig vo dr Safrezumft gsi.
Dr Niklaus Bischoff isch 1564 z Basel an dr Schwindsucht gschdorbe.
D Humanischde
Im Niklaus Bischoff siis Schdudium isch zwar nume churz gsi, aber offesichdlig vo hocher Qualidät, denn er het mit bedütende Humanischde über glehrti Sujet korreschbondiert, wie mit em Erasmus vo Rotterdam, em Beatus Rhenanus, em Viglius Zuichemus, em Vadianus odr em Joachim Camerarius. Er isch ä bsundrigs guete Fründ vom Erasmus gsi und het en no churz vor däm siim Dod chönne go bsueche, wo nume no wenig Lüt das hai döfe. Er isch zsämme mit em Hieronymus Froben im Erasmus si Teschtamäntvollschdrecker gsi und het au ä chliini Erbschaft gmacht.
Quelle
- Georg Agricola, Ausgewählte Werke, Deutscher Verlag der Wissenschaften 1956, S.282
- Thomas Brian Deutscher, Peter G. Bietenholz, Contemporaries of Erasmus: A Biographical Register of the Renaissance, University of Toronto Press 2003, S.437
