D Marion Gentges (CDU) isch sit 2021 d Ministere, dr Siegfried Lorek (CDU) dr Staatssekretäär. Dr Läitend Beamti und Amtsschef isch sit 2016 dr Ministeriaaldiräkder Elmar Steinbacher (CDU).
Dr Naame vom Ministerium
Vo 1952 bis 1984 het d Behörde Ministerium vo dr Justiz ghäisse, vo 1984 aa isch si Naame Ministerium vo dr Justiz und für Bundesaagläägehäite gsi, denn isch s vo 1991 aa wider nume no s Ministerium vo dr Justiz gsi, ab 2016 Ministerium vo dr Justiz und für Öiropa und im Joor 2021 isch s zum Ministerium vo dr Justiz und für Migrazioon worde.
Dr Gschäftsberiich
Dr Ufgoobe- und Zueständigkäitsberiich umfasst:
Sämtligi Verwaltigsaagläägehäite im Beriich vo dr ordentlige Grichtsbarkäit, vo de Staatsaawaltschafte, vo dr Verwaltigsgrichtsbarkäit, vo dr Finanzgrichtsbarkäit, vo dr Soziaalgrichtsbarkäit und vo dr Aarbetsgrichtsbarkäit vom Land;
d Usarbäitig vo Gsetzentwürf und d Brüefig vo verfassigsrächtlige Frooge, sowit nit anderi Ministerie zueständig si (Funkzioon as sog. Justiziaar vo dr Landesregierig);
die rächtligi Beguetachdig vo Gsetzentwürf;
d Bearbäitig vo zwüschestaatlige Aagläägehäite vo dr Rächtspflääg;
d Brüefig und Usbildig voms juristische Noochwuggs und vo de Kandidaate für d Laufbaane in de Grichtsbarkäite, wo in Nr. 1 ufzellt si.
as Rächt vo dr Bräss;
Migrazioon.
D Behörde het iire Sitz z Stuttgart und geegewärtig schaffe dört 200 Mitarbäiter. D Läitig vom Justizministerium bestoot us em Ministeriaaldiräkder as Amtsschef und em Justizminister as höggstem Dienstvorgsetzte vo alle Mitarbäiter vom Justizministerium, und dä het au no die politischi Verantwortig für e Justizressor.
