Im 13. Jaarhundert isch d Stadt Züri e freji Rychsstadt worde. D Herrschaft i dr Stadt isch drum bim Rychsvogt und deils au bi dr Äptissin vom Fraumöischter glääge. Dr Stadtraat und dr Schultheiß händ nur minderi Rächt gha.
D Stadt het bi dr Zouftrevoluzion vom Rudolf Brun ane 1336 e Regierig mit zwei Bürgmermäischter übercho, wo uf Läbeszyt gwäält gsi sind und wo sech al halb Jaar im Ampt abglöst händ. Das Regime het bis ane 1798 funkzioniert.
I dr Helvetik hät Züri d Herrschaft über s Züripiet usserthalb vo de Stadtmuure verlore, wo am 12. Februar 1798 die alti Regierig mit ere Proklamazion d Gwalt abgläit het. Am 26. April 1798 hät Züri für d Gmeindsache d Munizipalität Züri gwäält, wo als Kollegium d Gschäft gfüert hät. Jetz isch Züri wie alli andere Ortschafte als Munizipalgmeind innerhalb vom nöi gschaffene Kanton Züri organisiert gsi – das isch dr Afang vo dr politische Gmeind gsi. Züri isch em helvetische Distrikt Züri zueteilt gsi, wo vomene Understatthalter gfüert worden isch. D Zöift hät’s nümme ggè. Dr Kanton hät kei Regierig gha, dr Regierigsstatthalter vo dr helvetische Zäntralregiierig hät d Kantonsverwaltig gleitet. Dr erscht Presidänt vo dr Zürcher Munizipalität isch, mid Underbrüch, dr Hans Conrad Escher von der Linth gsi, wo da drmit fasch wie en erschte Stadtpresidänt gwürkt hät.
Dr Titel Bürgermäischter isch vo 1803 a, sid dr Mediazionszyt, und bis 1869 füre Presidänt vo dr Kantonsregierig pruucht worde, und d Stadtgmeind hät ane 1803 nöi en Stadtpresidänt übercho.
Bürgermäischter vo Züri vom Middelalter bis Ändi 18. Jaarhundert
