D Liichtathletik het us de Beweegigsablöif vom Renne, Gumpe und Gheie, wo sit Urzite für e Mensch natürlig und grundlegend si, Sportarte mit umfangriiche Reegle gmacht, so dass mä en indiwiduelli Läistig exakt cha mässe und mit dere vo öbber anderem vergliiche. Vo iire chunnt s olümpische Motto „Schnäller, hööcher, witer“ und si bildet mit iire Diszipline s Härzstück vo de Olümpische Spiil. Im Volkssport, wo d Läistig vo zwäitrangiger Bedütig isch, het vor allem dr Usduurlauf e Hufe Aahänger.
D Diszipline
D Diszipline vo dr Liichtathletik wärde in d Gruppe Lauf, Sprung und Wurf iidäilt. Meerkämpf bestöön us meerere Diszipline us alle vo dene drei Grubbe.
Wil Manne körperlig im Durchschnitt sterker und gröösser si as Fraue, konkurriere d Gschlächter bi Wettkämpf separat.
Dr Underschiid zwüsche de Bestläistige vo de Manne und vo de Fraue isch bim Renne und Laufe öbbe zää und bim Gumpe öbbe fufzää Brozänt. Bi de Diszipline vom Gheie cha mä d Resultat nid vergliiche, wil d Fraue liichteri Gräät verwände.
D Diszipline, wo hüte üüblig si chömme in de Däbälle undenooche vor (olümpischi Diszipline si in Fettdruck; F = nume Fraue; M = nume Manne):[1]
