D Herrschaft Landsbärg bi Colmar im Elsass het vom 13. bis zum 17. Joorhundert bestande.
Verwaltigssitz
Dr Verwaltigssitz vo dr Herrschaft Landsbärg het sich uf dr Burg Holandsbärg befunde, wo dr Vogt vo Colmar, dr Siegfried vo Gundolshäim 1279 uf e Befääl vom Köönig Rudolf vo Habsburg baut het.
Umfang
D Herrschaft isch sit 1281 im Bsitz vo de Habsburger gsi und het nüün Dörfer umfasst: Kientze, wo 1303 Residänzort wurde isch, Ammerschwihr, Dìrke, Ìngersche, Kàtzedàl, Meywihr, Nìdermorschwìhr, Sìjelse und Wìnzne.
Gschicht
D Herrschaft het ursprünglig eme Gschlächt ghöört, wo sich noch em Naame vo dr Herrschaft vo Landsbärg gnennt het. 1234 erschiint e Günther vo Landsbärg, wo zämme mit sinere Frau Belina und sine Chinder iiri Güeter z Guebwiller em Brueder Gotfrid, wo Mäister vom Dütsche Ritterorde z Ruffàch gsi isch, gschänggt het.[1] 1279 het dr Siegfried vo Gundolshäim afo d Burg Hohlandsbärg usbaue. E baar Joor spööter, 1281, isch d Herrschaft an d Herre vo Habsburg gfalle, wo d Festigsaalaag dört groosszüügig usbaut häi.
D Hohlandsburg isch dr offiziell Hauptort vo dr vorderööstriichische Vogtei gsi, bis si im 15. Joorhundert iiri Funkzion as Verwaltigssitz verloore het und vo de Habsburger an Adelsfamilie verpfändet worde isch. 1363 het dr Herzog Rudolf IV. vo Ööstriich s Leeche uf Burg und Herrschaft für 1000 Florint an die drei Brüeder Rappoltstäi (Ribeaupierre) verchauft, wo z Rappoltswiler aasässig gsi si. 1398 si d Burg und d Herrschaft an dr Groof Johann vo Lupfe cho, wo dä d Herzlaude vo Grooss-Rappoltstäi ghürootet het, d Dochder vom Ulrich VII. zu Grooss-Rappoltstei und Hohenack und sit 1377 offiziell Regäntin. D Lupfener häi s Leeche bis 1563 bhalte.
1563 häi d Erbe vo de Groofe vo Lupfe d Herrschaft an dr kaiserlig General und Staatsmaa Lazarus vo Schwend verchauft, wo 1568 vom Kaiser Maximilian II. zum „Riichsfreiherr vo Landsbärg“ erhoobe worde isch. Dä Ditel isch 1572 in „Riichsfreiherr vo Hoochelandsbärg“ umgwandlet worde. Dr Schwendi het dr Herrschaft e vorbildligi Ornig gee und im Elsass und im Brisgau dr Wiibau gförderet. Zum Schwendische Amt Hoochelandsbärg häi d Ort Kientze, Sigolshäim, Ammerschwihr, Ingershäim und Wintzehäim und d Iikümft vom Wii z Turckhäim und andere Ort in dr Umgääbig ghöört. Noch em Schwendi sim Dood 1583 het s si Soon Hans Wilhelm († 1604) überchoo und denn äini vo sine Änkelinne, won e Groof vo Fürstebärg ghürootet het.
Sit em Friide vo Rijswijk (1697) isch s Gebiet vo dr Herrschaft Hoochelandsbärg au de jure französische Bsitz gsi. Dr König Louis XIV. het sie im Joor 1714 kauft und dr Stadt Colmar as Ersatz für s St.-Peters-Priorat, überloo, wo si de Jesuite häi müesse uberloo, wo dört e Kolleg ufdoo häi.
Weblingg
Fuessnoote
- ↑ ZGORh. Bd. 28, S. 88
|
Dä Artikel basiert uff ere fräie Übersetzig vum Artikel „Herrschaft_Landsberg“ vu de dütsche Wikipedia. E Liste vu de Autore un Versione isch do z finde.
|
