Dr Hans Ludmann vo Rotbärg († 1423) isch e Baasler Politiker im früeje 15. Joorhundert gsi.
Lääbe
Dr Hans Ludmann vo Rotbärg isch vor 1390 as Soon vom Ritter Henmann vo Rotbärg, Rootsherr und Bürgermäister vo Baasel uf d Wält choo. Er het d Ursula vo Andlau, d Witwe vom Henmann vo Efringe, ghürootet. Iiri Dochder Sophie isch d Frau vom Burkhard Zibol worde und het dr Stadt dr Schalerhoof am Rhiisprung verkauft für d Uniwersidäät, wo 1460 gründet worde isch. Im Ludmann si Brueder und äine vo sine Söön si au Baasler Bürgermäister worde und en andere Soon, dr Arnold, isch Bischof worde und het dr Bischofshoof baut.
Vo 1403 aa isch er Bürgermäister vo Baasel gsi. Dr Rotbärg het zur Clike vom Oberstzumftmäister Peter zum Ange († 1409) ghöört. Zämme mit em Henmann Fröwler vo Eerefels († zwüsche 1413 und 1417) het er immer mee Macht in sine Händ konzentriert. Wo dr Ange 1409 gstorbe isch, häi Opposizionelli us de Zümft under em Zumftmäister zum Schlüssel, em Henman Buchpart, e Rewolte organisiert. Das isch ene glunge und 1410 si dr Rotbärg und dr Eerefels us dr Stadt verbannt worde, wil er e gwaltdäätige Autokrat gsi sig und sich über d Verfassig äwäggsetzt häig. 1413 isch er Vogt z Altkirch gsi. Scho 1417 isch er begnaadigt worde und het zrug uf Baasel chönne. Dört het er e Hoof an dr Riddergass kauft, wo früener emol de Groofe vo Thierstäi ghöört het, und as Rotbärgerhoof zum Baasler Sitz vo dr Familie worde isch.
1417 het er vom Junker Hermann Schaler d Helfti vom Riichslääche Bamlach-Rhiiwiiler im Brisgau und alli Rächt drzue kauft. 1418 und 1420 isch er wider zum Bürgermäister gweelt worde.
Dr Ludmann vo Rotbärg isch 1423 gstorbe.
Kwelle
