De Mont Beuvray isch en 822 Meter höche isolierte Berg vom Morvan-Massiv i de Dèpartement Saône-et-Loire und Nièvre öppe 20 Kilometer westlich vo Autun, em antike Augustodunum. S Oppidum het e Flächi vo rund 135 Hektare und umfasst drai Erhebige. De Ort isch hüt en archäologische Park.
S Oppidum isch sit 1865 vo Archäologe undersuecht wore und ser guet erforscht. Nebet de Befestigunge het mer au Wonhüser und Werchstett usgrabe und uf em höchste Gipfel Le Porrey en Kultplatz. Nördlich vom Oppidum het mer ono en Fridhof mit Brandgreber gfunde.
De Chaiser Augustus het agornnet, as s Oppidum Bibracte verloo mues werde und het d Biwoner i de noije Stadt Augustodunum (hüt: Autun) agsidlet. I dere Stadt het mer drai Inschrifte gfunde, wo d Göttin Bibractis nenet.[1]
Schlacht bi Bibracte
D Schlacht zwüschet em Julius Cäsar und de Helvetier isch nöd bi Bibracte uustrait wore, sondern öppe 25 Kilometer südlich devo bi Montmort (Dép. Saône-et-Loire). Nochdem d Helvetier im April 58 v. Chr. vom Cäsar ghinderet wore sind, d Rhone bi Gempf z öberquere, hend die sich e Weg dör s Piet vo de Sequaner gsuecht und sind denn zu de Häduer cho. Scho afangs Juni het de T. Attius Labienus a de Saône d Tiguriner abegmacht. Am 20. Juni hend denn d Helvetier s Römische Heer aggriffe, wo underwegs uf Bibracte gsii isch, um dai Lebesmittel abzhole, wo ine d Häduer, as Römischi Fründ, versproche hend. D Schlacht het em spoote Vormittag agfange und isch bis i d Nacht ine gange. D Römer hend nöd nu s Heer vo de Helvetier vernichtet, sondern hend au d Wageburge gstürmt und gege Fraue und Chind chämpfe müese.[2] Wemer a de Zaale vom Cäsar globe tar, sind debi mindestens dopplet sovil Ziviliste umchoo. De Cäsar het den de Helvetier bifole, wider i iri Haimat zuruggcheere und d Sidlige wider uufzbaue.
Quelle
Hoptquelle: C. Julius Cäsar: De bello Gallico 1,21–26
.png)
