Berthold-Auerbach-Museum

Dialäkt: Schwäbisch

Dr Berthold Auerbach, a Porträt mit-ra Schriftprob us dr Midde vom 19. Jôhrhondert

S Berthold-Auerbach-Museom em Stadtdoil Nordstedda vo Horb am Necker em Landkreis Freidastadt ischt a Litradurmuseom, wo an da Schriftsteller Berthold Auerbach erennret, wo en sellem Ort uff d Welt komma ischt. Des Musiom ischt em Jôhr 1986 vom Schiller-Nazionalmuseom Marbach am Necker em Barockschloss vo Nordstedda eigrichdet wôrra.

Ausstellong

Ôôgugga kô-mr en deam Museom Handschrifda, Bilder, Erschtausgaba ond andre Dokument us-em Leaba ond Werk vom Schriftsteller Berthold Auerbach, wo am 28. Februar 1812 als Kend vo-ra jidischa Familie en ganz bescheidene Vrheltnis z Nordstedda gebora wôrra ischt. Des Dorf, wo friher zo Vordereschtreich gheert hôt ond heitzodag a Stadtdoil vo dr Graußa Kreisstadt Horb am Necker ischt, ischt au Schaublatz vo-ma graußa Doil vo seine Schwarzwälder Dorfgeschichten (vrfasst vo 1843 bis 1854) gwäa, wo-nan zo-ma Erfolgsautor vom 19. Jôhrhondert ond zo-ra eiropäischa Berihmtheit gmacht hend. Dr Auerbach-Litradurkreis vrôstaldet en deam Haus reglmäßig Vorträg ond Autora-Leasonga. An viir Sonndich em Jôhr biadet des Museom d Nordstedder-Litradur-Schbaziirgeng ôô. Dô drbei fihret d Mitgliider vom Kuldur- ond Theadrforum Nordstedda dia Teilnehmer uff de Schbura vom Auerbach durch sei Hoimetdorf.

Was sonscht noh erwehnenswert ischt

Z Nordstedda erhalda bliiba send em Auerbach sei Geburtshaus Am Fabrikweg 2, wo heitzodag a Gedenkdafl an-en erennret, ond sei Ehragrab uff-em Jidischa Friidhof. Au a baar Schaublätz uss-em Auerbach seine Schwarzwälder Dorfgeschichten kô-mr noh ôôgucka, zom Beischbiil s frihere Gaschthaus Zum Adler, wo dr Lehrer Lauterbacher sei „Dorf-Universideet“ dren ondrhalda hôt, ond d Ziegelhütte, wo sich dr Held vo dr Erzehlong Kriegspfeife hôt dren gsondpfleaga lau.

Em Stadtdoil Bad Niedernau vo Raudaburg am Necker em Kreis Diibenga stôht em Raidtweag 15 em Bankjee Kilian von Steiner sei Sommrvilla Waldhaus, wo sich dr Auerbach en de Jôhr 1879 ond 1881 a lengera Zeit dren uffghalda hôt.

Litradur

• Scheuffelen, Thomas: Berthold Auerbach 1812–1882 (Marbacher Magazin 36), Marbach am Neckar 1986.

Weblink

• Berthold-Auerbach-Museum ibrs Museom uff dr Webseid vo dr Stadt Horb
• Berthold Auerbach und die jüdische Gemeinde in Nordstetten uff alemannia-judaica.de
• Berthold-Auerbach-Museum im Schloß uff Literaturland Baden-Württemberg

48.4371388.703633Koordinate: 48° 26′ 13,7″ N, 8° 42′ 13,1″ O

Dä Artikel basiert uff ere fräie Übersetzig vum Artikel „Berthold-Auerbach-Museum“ vu de dütsche Wikipedia. E Liste vu de Autore un Versione isch do z finde.