Die Badisch-Elsässische Bürgeriniziative si Zämmeschlüss vo Bürger im Badische und im Elsass gsi, wo sich für ökologischi Ziil iigsetzt häi. Si häi sich im Bundesverband Bürgeriniziative Umwältschutz (BBU) organisiert.
Gschicht
Aachlääber gege s Atomchraftwärk Wyhl
Im Mai 1972 het s die erste Brotest vo Atomchraftgegner uf dr lingge Site vom Rhii gege s blaante Atomchraftwärk z Fessehäim ge, und im Septämber häi Winzer vom Kaiserstuel gegen e blaants Atomchraftwärk bi Brisach demonstriert. Wo am 19. Juli 1973 dr Standort vom ene nöije Atomchraftwärk z Wyhl bekannt worde isch, häi sich in dr ganze Umgääbig spontan Bürgeriniziative organisiert. 1975 häi sich 21 Grubbe vo bäide Site vom Rhii zum en Internazionale Komitee zämmegschlosse, zum gege s Bleichemiiwärk bim elsässische Markolsheim z demonstriere. Mit Stärnmärsch, Petizione an d Obrikäit, Demonstrazione und Bsetzige vo disputierdem Gländ häi d Bürgeriniziative gwaltlos gege s Kärnchraftwärk Wyhl kämpft und im April 1977 vom Freiburger Verwaltigsgricht dr Bschäid überchoo, ass s Chraftwärk nid döfi baut wärde. Aber erst in de 1980er Joor isch dr Blaan schliesslig ufgee worde.
