Gaspé is 'n dorp op die skiereiland Gaspésie, Quebec, Oos-Kanada, met 15 163 inwoners (2011), waar Jacques Cartier op 24 Julie 1534 voet aan wal gesit het. 'n Monument en 'n granietkruis is as gedenktekens hier opgerig. Die Cathédrale de Gaspé is die enigste katedraal in Kanada wat van hout gemaak is en spog met 'n bont glasvenster en fresko ter herdenking van die vierhonderdste verjaardag van Jacques Cartier se landing. Die Musée de la Gaspésie behandel die geskiedenis van die gebied en sy mense wie se voorvaders Indiaans, Baskies, Bretons, Acadies, Iers, Skots en Lojaliste was.
Die belangrikste nywerhede in Gaspé is vissery, visverwerking, bosbou en toerisme.
In die taal van die Mic-Mac-Indiane beteken gaspeg "die einde van die wêreld".
.svg){kind=small}
