Die Amerikaanse kruloorkat (Engels: American Curl) is ’n katras wat uitgeken kan word aan sy ongewone ore, wat van sy gesig af terugkrul na die middel van sy agterkop.
Geskiedenis
’n Amerikaanse kruloorkat.
Die ras het in 1981 in Lakewood, Kalifornië, ontstaan vanweë ’n spontane mutasie.[1] ’n Amerikaanse kruloorkat is in 1983 vir die eerste keer op ’n katskou ten toon gestel en in 1987 het die langharige weergawe kampioenskapstatus gekry by The International Cat Association (TICA). In 1993 het die kat die eerste ras geword wat tot die kampioenskap-afdelings vir lang én kort hare van die Amerikaanse Cat Fanciers' Association (CFA) toegelaat is.[2]
Beskrywing
Die kat is van gemiddelde grootte en bereik eers ná 2 tot drie jaar volwassenheid. Hulle is sterk en gesond. Hulle moet versigtig gehanteer word, anders kan die ore se kraakbeen beskadig word. Die lang- en kortharige weergawes het albei sagte, syagtige hare wat plat teen hul lyf lê.
Klein katjies word met reguit ore gebore wat binne 10 dae begin krul. Ná vier maande sal die ore nie verder krul nie en behoort hulle hard te voel. Skoukatte se ore moet in ’n boog van tussen 90 en 180 grade krul. ’n Kat waarvan die ore aan die agterkop raak, word gediskwalifiseer.
